Belarusning Mi-24 vertolyoti Ukraina tomon uchayotgan Rossiyaning “Gerber” zarba beruvchi dronini urib tushirdi. Bu haqda Ukraina razvedkasi ma’lum qildi.
Ma’lum qilinishicha, hodisa 12-iyul kuni yuz bergan. Urib tushirilgan dron qoldiqlari Gomel viloyati hududiga qulagan. Nishon Mi-24 vertolyoti tomonidan yo‘q qilingan. Ekipaj havo hududini nazorat qilish paytida dronni aniqlangani va yo‘q qilgani haqida xabar bergan.
Manbalarga ko‘ra, Belarus osmonida o‘sha paytda Rossiyaning kamida uchta droni bo‘lgan. Rossiya 12-iyulga o‘tar kechasi Ukrainaga eng yirik aviahujumni amalga oshirgan. Unda 623 ta aviatexnika, jumladan, 597 ta dron va 26 ta X-101 qanotli raketalari ishtirok etgandi.
O‘shanda Ukraina havo mudofaasi 602 ta nishonni, shuningdek, 319 ta dron va 25 ta X-101 qanotli raketalarini urib tushirgan. Harbiy texnikalarning aksariyati Ukraina g‘arbiga qarab uchayotgan bo‘lgan. Rossiya hujumi oqibatida Lvov, Chernovets, Lutsk va boshqa shaharlarda vayronagarchiliklar qayd etilgan.
Rossiya Ukrainaga qarshi Gerber dronlaridan ommaviy ravishda foydalanmoqda, ular jangovar qismni tashish va radioelektron razvedka qilish qobiliyatiga ega. Dron Xitoy dvigateli, AQSH, Shveysariya va Niderlandiya tomonidan ishlab chiqilgan chiplar bilan jihozlangan.
Izoh (0)