Toshkent shahrida kibero‘g‘rilik bilan shug‘ullangan jinoiy guruh fosh bo‘ldi. Ular odamlar telefoniga virusli dastur yuklab, shaxsiy maʼlumotlar orqali bank kartalaridan pul o‘g‘irlab kelgan.
Toshkent shahar IIBB boshliq o‘rinbosari Jahongir Saʼdullayevning maʼlum qilishicha, jinoiy guruhdagilar turli davlat fuqarolari bo‘lgan. Ular Telegram’da maxsus guruh tuzib, faoliyat yuritgan.
Jinoiy guruh 177 kishining bank kartasidan jami 1 milliard so‘mga yaqin pullarni noqonuniy o‘tkazmalar orqali o‘zlashtirgan. Barcha harakatlar Call-markaz orqali nazorat qilingan.
Jinoyatchilar odamlarga Telegram’dan Apk fayllar yuborgan. Shu orqali fuqarolar telefonidagi SMS kodlar, kontaktlar, qo‘ng‘iroqlar tarixi va bank maʼlumotlarini qo‘lga kiritgan.
Hozirda jinoiy guruhning boshqa aʼzolarini aniqlash va jinoyatni to‘liq fosh etish bo‘yicha surishtiruv ishlari davom ettirilmoqda. Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, gumonlanuvchilar protsessual tartibda ushlangan.
Izoh (0)