Braziliya va Vashington o‘rtasidagi kelishmovchiliklar keskinlashgani fonida Braziliyaning San-Paulo shahrida o‘tkazilgan namoyishda AQSH prezidenti Donald Trampning yuzi tasvirlangan qo‘g‘irchoq va Amerika bayrog‘i yoqib yuborildi. Bu haqda Metropoles gazetasi xabar bermoqda.
Nashrning yozishicha, namoyish tadbirlarida jamoatchilik Oq uy rahbari sobiq prezident Jair Bolsonaruga qarshi sud jarayoniga javoban joriy etishga qaror qilgan Braziliya eksport mahsulotlariga qo‘yilgan bojlarni qattiq tanqid qilgan.
Metropoles’ning ma’lum qilishicha, miting jamoat tashkilotlari, kasaba uyushmalari va so‘l partiyalardan bo‘lgan parlament a’zolari tomonidan uyushtirilgan.
Braziliya prezidenti Luis Inasiu Lula da Silva Amerika prezidentining Braziliya tovarlariga 50 foizlik bojlar joriy etilishini e’lon qilgan maktubi mazmunini bema’ni deb baholadi.
Braziliya rahbari, agar AQSH rahbariyati 1-avgustgacha Braziliya mahsulotlariga e’lon qilingan 50 foizlik tariflarni bekor qilmasa, o‘sha sanadan boshlab AQSHdan keladigan tovarlarga xuddi shunday bojlar joriy etilishini ma’lum qildi.
7-iyul kuni Tramp Truth Social ijtimoiy tarmog‘ida o‘zining ittifoqchisi va Braziliyaning sobiq rahbari Bolsonaru siyosiy ta’qiblarga uchrayotganini aytdi. Oq uy rahbari unga nisbatan “jodugarlar ovi”ni to‘xtatishga chaqirdi.
Lula da Silva bunga javoban Amerika yetakchisiga mamlakatning ichki ishlariga aralashmaslikni maslahat berdi.
Braziliya yetakchisi Luis Inasiu Lula da Silva iyun oyida AQSH prezidenti Donald Tramp internet va ijtimoiy tarmoqlarda vaqt sarflash o‘rniga davlat rahbari sifatidagi vazifalarini bajarishga e’tibor qaratishi lozimligini bildirgandi.
Izoh (0)