Amerikalik qo‘shiqchi Ledi Gaganing Braziliyada bergan konserti tashrif buyuruvchilar soni tufayli Ginnes rekordlar kitobiga kiritildi. Tadbirda taxminan 2,5 million kishi ishtirok etdi.
Rio de Janeyroning mashhur Kopakabana plyajida bo‘lib o‘tgan bepul konsert Gaga uchun 13 yillik tanaffusdan keyingi birinchi shousi bo‘ldi. Bu chiqish tarixdagi eng ko‘p tomoshabinga ega bo‘lgan yakkaxon musiqiy konsertga aylandi. U shu joyda, bir yil avval — 2024-yil 4-mayda Madonnaning o‘rnatgan rekordini yangiladi. O‘shanda konsertga 1,6 millionga yaqin tomoshabin to‘plangan edi.
Har ikki konsert Live Nation kompaniyasi va Rio shahar turizm agentligi ko‘magida tashkil etilgan bepul shoular turkumi doirasida o‘tkazildi. Faqatgina Gaganing konserti shahar iqtisodiyotiga taxminan 105,8 million AQSH dollari daromad keltirgani baholandi.
Shou vaqtida Kopakabana plyaji tomoshabinlar tilida “Gagakabana” deb atalgan. Ledi Gaga yangi Mayhem albomidan qo‘shiqlarni hamda Born This Way, Paparazzi, Poker Face va Bad Romance kabi mashhur xitlarini ijro etdi.
Sahna ortidan u quyidagicha minnatdorlik bildirdi:
Men bilan birga tarix yaratganingiz uchun rahmat. Braziliya xalqi — sizlar sabab men porlay olaman, dedi Gaga.
Ta’kidlash joizki, Rod Styuart 1994-yil Yangi yil arafasida shu plyajda taxminan 3,5 million tomoshabinni yig‘gan edi. Biroq bu raqamga faqat konsert uchun kelganlar emas, balki tungi mushakbozlikni tomosha qilishga chiqqanlar ham kirgan bo‘lishi mumkin.
Izoh (0)