Harley-Davidson yangi bojlar tufayli zavodlarini AQShdan ko‘chiradi
AQShning Harley-Davidson kompaniyasi Yevropaga sotiladigan motosikllarni ishlab chiqaruvchi zavodlarini yangi bojlar tufali mamlakatdan tashqariga ko‘chiradi. Bu haqda The Wall Street Journal’ga tayanib, “Vedomosti.ru” xabar berdi.
AQShning qimmatli qog‘ozlar va birjalar bo‘yicha Komissiyasi (SEC) saytidagi e’londa Yevropa Ittifoqi Qo‘shma Shtatlardan import qilingan motosikllarga nisbatan bojlarni 6 foizdan 31 foizga oshirgani xabar qilingan. Bu degani, har bir motosikl narxi 2200 dollarga qimmatlashadi. Natijada Yevropa joriy qilgan yangi bojlar tufayli Harley-Davidson 90—100 million dollar zarar ko‘radi. Shunga qaramasdan, kompaniya Yevropadagi biznesi moliyaviy zarar ko‘rishiga qaramasdan motosikllar narxini oshirmasligini ma’lum qilgan.
Yevropa bozori kompaniya uchun ahamiyatliligi bo‘yicha ikkinchi o‘rinda turadi. 2017-yili kompaniya Yevropada 44 935 ta motosikl sotgan. Bu jami sotilgan motosikllarning 18,5 foizi bo‘lib, AQSh tashqarisida sotilgan motosikllarning yarmini tashkil qiladi. Ishlab chiqarishni AQShdan ko‘chirish 9 oydan 18 oygacha vaqt oladi va qo‘shimcha sarmoya talab qiladi. Motosikllar Yevropaga Hindiston, Braziliya va Taylanddangi zavodlardan eksport qilinadi.
25-iyun, dushanba kuni Harley-Davidson aksiyalari narxi 2,7 foizga tushib ketgan.
Bir yil ilgari AQSh prezidenti Donald Tramp Oq uyda Harley-Davidson’ning bosh menejerlari bilan uchrashgan. Tramp kompaniyani “Yangi amerikacha ruh”ning timsoli deb atagan.
O‘tgan haftada kompaniya Kanzas-Sitida motosikllarni yig‘ish bilan shug‘ullanadigan zavodning yopilishi va 800 nafar xodimning ishdan bo‘shatilganini e’lon qildi. Harley-Davidson’ning ijroiya direktori Metyu Levatich kompaniyaning savdoda muvaffaqiyatsizlikka uchrayotganini Trampning savdo-sotiq siyosati bilan bog‘lagan.
22-iyun, juma kuni Yevropa komissiyasi 2,8 milliard yevroga teng Amerika import tovarlariga nisbatan qo‘shimcha 25 foiz boj joriy qildi. Yangi bojlar po‘lat, alyuminiy, motosikl, jo‘xori, burbon (AQShda jo‘xoridan tayyorlanadigan viski turi) va jinsi singari tovarlarga nisbatan joriy qilingan. Iyun oyi boshida Donald Tramp Yevropa Ittifoqi, Kanada va Meksika mahsulotlariga nisbatan qo‘shimcha soliqlar joriy qilgan edi: po‘latga 25 foiz va alyuminiyga 10 foiz. Yevropa komissiyasining hisob-kitobiga ko‘ra, yangi bojlar 6,4 milliard yevrolik Yevropa eksport tovarlariga nisbatan joriy qilinadi.
