AQSH prezidenti Donald Tramp Braziliyada ishlab chiqarilgan tovarlar importiga 50 foizlik soliq solishini ma’lum qildi. Bu haqda BBC xabar berdi.
Tramp bu qarorini ijtimoiy tarmoqda e’lon qilgan va Braziliyaga rasmiy xat yuborgan. Unda Tramp Braziliyani AQSH texnologiya kompaniyalariga “hujumlar” uyushtirganlikda ayblagan. Shuningdek, u sobiq Braziliya prezidenti Jair Bolsonaruga qarshi sudni bekor qilishni talab qilmoqda. 2019—2022-yillarda Braziliyani boshqargan Bolsonaru 2023-yil yanvar oyida davlat to‘ntarishiga urinishda ayblanib, sudlanmoqda.
Braziliyaning amaldagi prezidenti Luis Inasiu Lula da Silva Trampning savdo bojlariga “javob qaytarilishini” ma’lum qilgan. U Trampni mamlakat sud tizimiga aralashmaslikka chaqirgan.
AQSH prezidenti, shuningdek, shu hafta boshida Lula bilan Bolsonaru ustidan sud jarayoni haqida bahslashgandi. O‘shanda Lula Braziliya hech qanday “aralashuvni” qabul qilmasligini aytgan. Xususan, Lula shunday degan: “Hech kim qonundan ustun emas”.
Braziliyaga yo‘llangan maktubda Tramp mamlakatning sobiq prezidenti Bolsonaru haqida ijobiy fikr bildirib, uni “juda hurmat qilishini” bildirgan. Unga ko‘ra, prezidentga qarshi davom etayotgan sud jarayoni “xalqaro sharmandalikdir”.
Shu haftada AQSH dunyoning turli mamlakatlariga, jumladan, Yaponiya, Janubiy Koreya va Shri Lanka kabi savdo hamkorlariga yangi bojlar belgilagan. Ular 1-avgustdan kuchga kirishini aytib, prezident mamlakat rahbarlariga 22 ta maktub yo‘llagan. Ammo Braziliyaga yuborilgan xabar ancha keskinroq bo‘lib, ilgari bu mamlakat tovarlariga 10 foizlik boj solingan edi.
Tramp maktubda Braziliya hukumatini “erkin saylovlar va amerikaliklarning asosiy so‘z erkinligi huquqlariga qarshi makkorona hujumlarda”, jumladan, “AQSH ijtimoiy tarmoqlarini senzura qilish”da ayblagan.
Braziliya ilgari Ilon Maskning X platformasini vaqtincha bloklagandi. Sababi platforma 2022-yilgi Braziliya prezidentlik saylovlari haqida noto‘g‘ri ma’lumot tarqatayotgan akkauntlarni bloklashdan bosh tortgan. Iyun oyida Braziliya Oliy sudi ijtimoiy tarmoq kompaniyalari o‘z platformalarida joylashtirilgan kontent uchun javobgarlikka tortilishi haqida qaror chiqargan.
Izoh (0)