Isroil Eronning beshta harbiy obyektga, jumladan, yirik aviabazaga zarba bergani haqidagi ma’lumotlarni oshkor qilmadi. Bu haqda Britaniyaning Telegraph gazetasi Oregon shtati universiteti xodimlari tomonidan sun’iy yo‘ldosh ma’lumotlari tahlilidan kelib chiqib xabar berdi.
“Ushbu ma’lumotlarga ko‘ra, Eronning oltita raketasi Isroilning shimoli, janubi va markazidagi ilgari e’lon qilinmagan beshta harbiy obyektga, jumladan, yirik aviabaza, razvedka ma’lumotlarini yig‘ish markazi va logistika bazasiga teggan”, deya yozadi gazeta.
Nashrning qo‘shimcha qilishicha, yana 36 ta raketa Isroil havo mudofaa tizimini yorib o‘tishga muvaffaq bo‘lgan.
Isroil mudofaa armiyasi (SAXAL) nashrga obyektlarga yetkazilgan zarar haqidagi ma’lumotlarni sharhlashdan bosh tortgan.
“Faqat shuni aytishimiz mumkinki, barcha tegishli bo‘linmalar operatsiya davomida o‘z faoliyatini to‘liq saqlab qoldi”, dedi armiya vakili.
Telegraph isroillik jurnalistlarning harbiy obyektlarga zarbalar haqidagi ma’lumotlarini ham keltiradi. Masalan, “13-kanal”dan Raviv Druker “biz hali ham xabar qilmagan” “ko‘plab” raketalar tushgani haqida ma’lum qilgan.
Eronlik manbaning tushuntirishicha, Isroil havo hujumidan mudofaa tizimini yorib o‘tish uchun raketalar va dronlarning kombinatsiyalangan uchirilishi qo‘llangan, bu esa havo mudofaasini chalg‘itgan.
“Isroil tomonga kamikadze dronlarni uchirishdan asosiy maqsad ularning tizimlarini doimiy ravishda band qilib turishdir. Ko‘pchiligi hatto yetib bormaydi — ularni yo‘lda ushlab qolishadi, lekin ular baribir chalkashlik keltirib chiqaradi”, dedi u.
Isroil va Eron o‘rtasidagi mojaro 13-iyundan 24-iyungacha davom etdi. U Isroil harbiy-havo kuchlarining islom respublikasi hududiga havo hujumlari bilan boshlandi, bu esa Tehronning javob raketa zarbalariga sabab bo‘ldi. Ikki tomondan ham halok bo‘lganlar va yaradorlar bor. 22-iyunga o‘tar kechasi Qo‘shma Shtatlar jangovar harakatlarga qo‘shildi, shundan so‘ng Eron kuchlari Qatardagi Amerika harbiy bazasiga zarba berdi.
Isroil rahbariyati harbiy operatsiyaning boshlanishini Eronning yaqin kelajakda yadro quroli yaratish, shuningdek, raketalar to‘plash tahdidi bilan izohladi. Tehron yadro qurolini ishlab chiqishda ayblovlarni qat’iyan rad etib, tinch atom energetikasini rivojlantirish huquqiga ega ekanligini ta’kidladi.
Izoh (0)