O‘zbekiston terma jamoasi a’zosi Abbosbek Fayzullayevning Moskvadagi “SSKA” klubidan Istanbulning “Bashakshehir” jamoasiga o‘tishi oddiy transfer emas, balki City Football Group (CFG) tomonidan strategik asosda amalga oshirilgan qaror sifatida ko‘rilmoqda.
“Manchester Siti” skautlari aynan Fayzullayevni “Bashakshehir”ga tavsiya qilgan. Ushbu transfer “Bashakshehir” jamoasining City Football Group tarkibiga qo‘shilganidan so‘ng ro‘y bermoqda. Endilikda “Bashakshehir” ham CFG tizimidagi klub sifatida holding brendini Turkiya orqali yangi bozorlarga olib chiqishda vositachi bo‘lib xizmat qiladi.
Transfer ortida yotgan omillar
Abbosning “SSKA”dan ketishi va “Bashakshehir”ga o‘tishi ortida bir qancha sabablar bor:
- Fayzullayevning “SSKA” bilan shartnomasi 2026-yilda yakunlanadi, shuning uchun moskvaliklar uni yuqori narxda sotishga urinmoqda;
- Rossiya klublarining Yevropa orqali pul tushumlarini olishdagi muammolari;
- Turkiya-Rossiya bank tizimlari orqali to‘lovlarni amalga oshirish imkoniyati;
- O‘zbekiston va Turkiya o‘rtasidagi madaniy yaqinlik;
- Fayzullayevning City Football Group brendining Markaziy Osiyodagi yuziga aylanishi ehtimoli.
- Husanovdan keyin markaziy Osiyo mintaqasi bozoriga kirish
Markaziy Osiyo bozoriga kirish
2025-yilgi qishki transferlar oynasida o‘zbekistonlik himoyachi Abduqodir Husanov 40 million yevro evaziga “Manchester Siti”ga o‘tgandi. Ushbu transferdan so‘ng, City Football Group tarkibidagi “shaharliklar”ning muxlislari soni bir necha million nafarga ko‘paydi. Bu muxlislarning aksariyati O‘zbekiston hamda Markaziy Osiyoning boshqa davlatlariga mansub.
Ushbu jarayon fonida City Football Group Markaziy Osiyo futbol bozoriga chuqurroq kirishni maqsad qilmoqda. Buning uchun “Bashakshehir” klubi “koridor” vazifasini bajarishi mumkin.
Yaqinda Markaziy Olimpiya qo‘mitasi raisining birinchi o‘rinbosari Otabek Umarov CFG tarkibidagi jamoalardan birida yana bir o‘zbekistonlik futbolchining paydo bo‘lishi ehtimoli borligini ma’lum qilgan edi. Ehtimol, bu futbolchi aynan Abbosbek Fayzullayev bo‘lishi mumkin.
Shuningdek, ushbu holding O‘zbekiston Superligasida ishtirok etayotgan jamoalardan birini tarkibiga qo‘shib olish ustida ham o‘ylamoqda. Mish-mishlarga ko‘ra, CFG Farg‘onaning “Qo‘qon-1912” klubini xarid qilish ehtimolini ko‘rib chiqmoqda. Fayzullayev esa bu jarayonda birinchi “elchi” sifatida baholanmoqda.
Abbosbek Fayzullayevning “Bashakshehir”ga o‘tishi — oddiy klub almashtirish emas, balki City Football Group’ning global strategiyasiga asoslangan, Markaziy Osiyo futbolini integratsiyalash yo‘lidagi muhim qadamlardan biridir.
Ehtimol, Fayzullayev bu tizimga o‘tgan birinchi markaziy osiyolik futbolchi emas, lekin u so‘nggisi bo‘lmasligi aniq.
Izoh (0)