“Manchester Siti”ning o‘zbekistonlik himoyachisi Abduqodir Husanov Klublar o‘rtasidagi Jahon chempionatining 2-turi doirasidagi “Al-Ayn”ga qarshi o‘yinda maydonga tushdi. Uchrashuvni asosiy tarkibda boshlagan Husanov 61-daqiqada zaxiraga olindi.
Statistik ma’lumotlarga ko‘ra, Husanov 61 daqiqa ichida 80 marta to‘pga tegingan. U 68 ta uzatma amalga oshirib, ularning 63 tasi sheriklariga aniq yetib borgan — 93 foiz.
Husanov o‘yin davomida 6 marta to‘p uchun kurash olib borgan va ularning 2 tasida muvaffaqiyatga erishdi. U 2 marta havodagi kurashda qatnashib, har ikki holatda ham raqiblaridan ustun keldi. Shuningdek, u bitta kalit pas amalga oshirishga muvaffaq bo‘ldi. Shuningdek, u 5 marta uzoq masofaga uzatma amalga oshirgan bo‘lib, ularning 4 tasi aniq manzilga yetib borgan. Himoyachi 58-daqiqada sariq kartochka bilan ogohlantirildi.
Sofascore portali Husanovning o‘yinini 7,1 ball bilan baholadi. Bu ko‘rsatkich “Manchester Siti” tarkibidagi futbolchilar orasida o‘rtacha natijalardan biri hisoblanadi.
Uchrashuvning eng yaxshi futbolchisi deb ikki gol muallifi bo‘lgan Ilkay Gundo‘g‘an e’tirof etildi. U maydonda 90 daqiqa harakat qildi va Sofascore talqiniga ko‘ra, eng yuqori bahoni oldi — 9,2. Asosiy tarkibda o‘ynagan futbolchilar orasida eng past ballni 6,8 ko‘rsatkich bilan Niko Gonsales oldi.
Raqib jamoa — “Al-Ayn” safida eng yaxshi baho 6,4 ball bilan marokashlik hujumchi Sofian Rahimiga berildi.
Eslatib o‘tamiz, “Manchester Siti” bu uchrashuvda “Al-Ayn”ni 6:0 hisobida mag‘lub etib, guruh bosqichidagi ikkinchi g‘alabasini qo‘lga kiritdi. Gvardiola jamoasi musobaqaning 3-turida “Yuventus” bilan to‘qnash keladi. Uchrashuv 27-iyun kuni bo‘lib o‘tadi.
Izoh (0)