Madridning “Real” klubi hujumchisi Rodrigoga Angliya Premyer Ligasining bir qancha jamoalari qiziqish bildirmoqda. Bu haqda insayder Nikolo Skira o‘zining ijtimoiy tarmoqdagi sahifasida ma’lum qildi.
Manbaga ko‘ra, “Real” 24 yoshli braziliyalik futbolchi sotishga rozi, biroq uning uchun 120–130 million yevro atrofida tovon puli so‘ramoqda.
Rodrigo joriy yilda AQShda o‘tkazilgan Klublar o‘rtasidagi Jahon chempionati davomida bor-yo‘g‘i 92 daqiqa o‘ynab, 1 golli uzatma amalga oshirgan. Madridliklar bosh murabbiyi Xabi Alonso undan zaxira futbolchisi sifatida foydalanmoqda. Futbolchi bu holatdan norozi bo‘lib, klubdan ketishni istamoqda.
Hozirda unga bir nechta jamoalar, xususan, Angliya Premyer Ligasining “Manchester Siti”, “Arsenal” va “Liverpul” klublari qiziqish bildirmoqda. Shuningdek, Saudiya Arabistonining “Al-Hilol” hamda Fransiyaning “PSJ” klublari ham Rodrigoning atrofidagi vaziyatni kuzatib turibdi.
Ma’lumot uchun, Rodrigo 2024/25-yilgi mavsumda barcha musobaqalar doirasidagi 50 ta o‘yinda maydonga tushib, o‘z hisobiga 13 ta gol va 9 ta assist yozdirib qo‘ygan. Uning klub bilan amaldagi shartnomasi 2028-yilning yozigacha mo‘ljallangan. Transfermarkt portali futbolchining qiymatini 90 million yevroga baholamoqda.
Izoh (0)