Hindistonning Gujarat shtatidagi Mahisagar daryosi ustidagi Gambhir ko‘prigining bir qismi qulab tushishi oqibatida kamida o‘n kishi hayotdan ko‘z yumgan, yana olti kishi tan jarohati olgan. Bu haqda The Times of India nashri xabar bermoqda.
Dastlabki ma’lumotlarga ko‘ra, Vadodara va Anand tumanlarini bog‘lovchi 900 metr uzunlikdagi ko‘prikning ikkita ustuni orasidagi oraliq qulab tushgan. Ko‘prik o‘pirilishi paytida undan o‘tayotgan yuk mashinasi, furgon va yengil avtomobil daryoga tushgan.
Anand tumanidan saylangan parlament a’zosi Mitesh Patelning ma’lum qilishicha, hozirga qadar uchta jasad topilgan, yana to‘rt kishi qutqarib olingan.
“Qutqaruv ishlari Vadodara va Anand tumanlari ma’murlari rahbarligida davom etmoqda”, deya ta’kidladi u.
Mahalliy aholi birinchi bo‘lib yordamga shoshilgan va favqulodda xizmatlarni chaqirgan. Voqea joyida politsiya, o‘t o‘chiruvchilar va qutqaruvchilar faoliyat olib bormoqda.
“Ko‘prikning bir qismi to‘satdan qulab tushdi. Ayni paytda o‘tib ketayotgan uchta avtomobil daryoga tushib ketdi. Biz darhol qutqaruv ishlarini boshladik va 10 kishini daryodan chiqarib oldik”, dedi yong‘in xavfsizligi xodimi.
Qutqaruv operatsiyasi davom etmoqda. Hokimiyat organlari qulash sabablarini aniqlamoqda.
Gambhir ko‘prigi Vadodaradan (Gujarat shtatidagi uchinchi yirik shahar) taxminan 25 km uzoqlikda joylashgan bo‘lib, mintaqaning transport aloqasida muhim ahamiyatga ega.
Gujarat shtati ichki ishlar vaziri Harsh Sanghavining ma’lum qilishicha, voqea joyiga yuqori martabali vakillar guruhi yuborilgan, shtat bosh vaziri Bhupendra Patel shaxsan vaziyatni nazorat qilmoqda.
Bosh vazir 1985-yilda qurilgan ko‘prikka muntazam ravishda texnik xizmat ko‘rsatib kelinganini ta’kidlagan va fojia sabablari batafsil tekshirilishini va’da bergan.
Bundan avval Nepalning shimoliy qismida yuz bergan kuchli suv toshqini mamlakatni Xitoy bilan bog‘lovchi Miteri ko‘prigini vayron qilgani xabar qilingandi.
Izoh (0)