Islom dunyosi mamlakatlari o‘zaro savdo, investitsiya, moliyalashtirish va hamkorlikni rivojlantirish imkoniyatlaridan maksimal darajada foydalanishlari kerak. Bu haqda Turkiya prezidenti Rajab Toyyib Erdo‘g‘on Istanbulda o‘tkazilayotgan Islom iqtisodiyoti bo‘yicha 2-Jahon sammitida so‘zlagan nutqida ma`lum qildi.
Erdo‘g‘onning so‘zlariga ko‘ra, musulmonlar dunyo aholisining 25 foizini tashkil qilsa-da, islomiy moliya sektorining ulushi 2,5 trillion dollardan oshmaydi. Shu bilan birga, Islom hamkorlik tashkilotiga a’zo 57 mamlakat dunyo aholisining 25 foizini tashkil etib, global savdoning atigi 11 foizini va jahon iqtisodiyotining 9 foizidan kamrog‘ini nazorat qilmoqda.
“Bu raqamlar islom dunyosi o‘z salohiyatini to‘liq ro‘yobga chiqarmayotganini ko‘rsatadi”, dedi Turkiya rahbari.
Uning ta’kidlashicha, islom mamlakatlari savdo, sarmoya, hamkorlik va moliyani imkon qadar rivojlantirishi zarur.
Turkiya davlat rahbarining aytishicha, sammit nufuzli ishtirokchilarni birlashtiradi, ular islomiy moliya axloqidan tortib strategik rejalashtirish, islomiy o‘sish modellari, FinTech texnologiyalari va halol iqtisodiyot standartlarigacha bo‘lgan asosiy masalalarni muhokama qiladi. Uning so‘zlariga ko‘ra, bu muhokamalar islom olamini ko‘zlangan maqsadlarga yaqinlashtiradi.
“Turkiya har doim madaniyatlar va xalqlar o‘rtasidagi ko‘prik sifatidagi mas’uliyatini anglagan holda harakat qilgan. Biz Istanbul markazli islom moliyasini rivojlantirishga katta e’tibor qaratamiz. Istanbul moliya markazi doirasida boshlangan tashabbuslar ham global iqtisodiyotga integratsiyalashuvga, ham islomiy qadriyatlarni himoya qiladigan model yaratishga yo‘naltirilgan”, deydi Erdo‘g‘on.
Turkiya prezidenti zamonaviy global iqtisodiyot boshi berk ko‘chaga kirib qolganini ta’kidlagan.
“Iste’mol va foydani maksimallashtirishga asoslangan jahon tizimi insoniy qadriyatlarni ikkinchi o‘ringa surib qo‘yadi, tengsizlikni chuqurlashtiradi va ishlab chiqarishsiz o‘sishni rag‘batlantiradi. U asosiy muammolarni hal qilmaydi, faqat ularni vaqtinchalik choralar bilan yashiradi. Uning hozirgi ko‘rinishda davom etishi mumkin emasligini tobora ko‘proq ekspertlar tan olmoqda”, deydi Turkiya prezidenti.
Erdo‘g‘onnning qo‘shimcha qilishicha, adolat, birdamlik va xavf-xatarlarni taqsimlashga e’tibor qaratadigan islom iqtisodiyoti muqobil yechimni taklif qila oladi. Biroq uning so‘zlariga ko‘ra, bu yo‘nalishdagi salohiyat hali yetarli darajada amalga oshirilmagan.
“Barcha rag‘batlantirishlarimizga qaramay, Turkiyada islom banklari ulushi 8,1 foiz darajasida qolmoqda. Biz bu ko‘rsatkichni yetarli emas deb hisoblaymiz”, deb ta’kidladi Erdo‘g‘on.
Turkiya prezidenti global iqtisodiyot savdo urushlari va geosiyosiy xavf-xatarlardan tortib, aholining keksayishi va iqlim tahdidlarigacha bo‘lgan ko‘plab muammolarga duch kelayotganini eslatib o‘tgan.
Izoh (0)