Ijtimoiy tarmoqlarda bir necha fuqarolar Laboʼga suv to‘ldirib, cho‘milgani, ovqatlangani aks etgan video tarqaldi. Toshkent viloyati YHXB holat yuzasidan maʼlumot berdi.
Unga ko‘ra, Oqqo‘rg‘on tumanida harakatlanib ketayotgan avtoulovning yukxonasida turli hil harakatlarni amalga oshirib, jamiyatda yurish-turish qoidalarini qasddan mensimagan va jamoat tartibini buzgan, shuningdek, bu holatlarni tasvirga olib, ijtimoiy tarmoqqa joylagan fuqorolarga 12 sutka maʼmuriy qamoq jazosi belgilandi.
“Choyxonamizni negativ video orqali reklama qilmoqchi edik. Hammadan uzr so‘raymiz. Ichki ishlar xodimlari oshxonamizga kelib, bizni olib ketdi, tavbamizga tayandik. Boshqalarga tavsiya etmaymiz”, deydi fuqarolardan biri.
Shu kabi holat Toshkentda ham kuzatilgan. Toshkentda mashina salonini sellofan paket bilan o‘rab, ichiga suv to‘ldirib harakatlangan shaxslar ushlangandi.
Haydovchi transport vositasini boshqarganda odob-axloq qoidalarini buzgani, transport vositasi salonini sellofan paket bilan o‘rab, ichiga suv to‘ldirib harakatlangani aniqlangan.
“Sherigim bilan mashina ichiga suv to‘ldirib harakatlanganimizning videosini Instagram sahifamizga qo‘ygandim. Videoni kimdir tarqatib yuboribdi, qonunbuzarlik holati borligini bilmagandik. Inspektor xodimlari chaqirtirib, tushuntirish ishlarini olib bordi. Bu holatni tavsiya qilmayman va uzr so‘rayman”, deya uzr so‘ragandi haydovchi.
Izoh (0)