Rossiya Superkubogi bahsidan so‘ng Moskvaning “SSKA” klubi yarim himoyachisi Abbosbek Fayzullayev o‘zining jamoadagi kelajagi haqida fikr bildirdi.
G‘alabadan so‘ng jurnalistning “Bu sizning ‘SSKA’dagi so‘nggi o‘yiningiz bo‘lishi mumkinmi?” degan savoliga Fayzullayev quyidagicha javob berdi:
Bu mavzuda hech narsa deya olmayman, chunki o‘zim ham bilmayman, — deya futbolchining so‘zlarini keltirdi Championat nashri.
Shuningdek, u “O‘zbekiston terma jamoasi bilan JCH yo‘llanmasimi yoki ‘SSKA’ bilan qo‘lga kiritilgan ikkita sovrinmi (Rossiya Kubogi hamda Suerkubogi)” degan savolga shunday dedi:
O‘zbekiston terma jamoasi bilan Jahon chempionatiga chiqish — eng katta orzu. Ammo “SSKA” bilan qo‘lga kiritgan ikkita sovrin ham men va oilam uchun juda muhim. Ularni solishtira olmayman — har biri alohida qadrli.
Avvalroq OAVda Abbosbek Fayzullayev yozgi transfer oynasida Moskva klubini tark etishi mumkinligi haqida xabarlar tarqalgan edi. Unga Turkiyaning “Bashakshehir” klubi jiddiy qiziqish bildirmoqda. Mahalliy jurnalistlarning xabar berishicha, 21 yoshli o‘zbekistonlik futbolchi Istanbul klubi safiga o‘tishga rozi bo‘lgan va hozirda klublar uning ehtimoliy transferi borasida muzokara o‘tkazmoqda.
Ma’lumot uchun, Qozon shahridagi “Ak Bars Arena” stadionida bo‘lib uchrashuvda “SSKA” “Krasnodar” ustidan 1:0 hisobida g‘alaba qozondi. “Armiyachilar” ushbu g‘alaba orqali o‘z tarixida sakkizinchi bor Rossiya Superkubogini qo‘lga kiritdi. Bu borada klub faqatgina “Zenit”dan (9 marta) ortda qolmoqda.
Izoh (0)