Ba’zan film yoki serialning birgina kadri uzoq vaqt xotiramizda saqlanib qoladi — bu faqat kuchli sahna yoki yorqin replika tufayli emas, balki voqea sodir bo‘lgan joy tufayli ham.
“Taxtlar o‘yini”
Shimoliy Irlandiyadagi Uord qal’asini kinochilar Vesteros tarixining boshlanish nuqtasi bo‘lgan Starklar qirollik xonadonining qarorgohi va avlodlar maskani qal’asiga aylantirgan. Aslida bu qal’a Daun grafligida, Strangford-Lox ko‘rfazi yaqinida joylashgan.
San-Xuan-de-Gastelugache — serialda Targariyenlar sulolasining vataniga aylangan haqiqiy joy. Bu Ispaniya qirg‘oqlari yaqinidagi qoyali orol bo‘lib, quruqlik bilan ko‘prik orqali tutashgan. Serialda aynan shu yerga Deyeneris Targariyen Vesteros yerlariga ilk bor qadam qo‘yadi.
“Andisha va g‘urur”
Angliyadagi Uiltshir grafligida joylashgan Staurhead bog‘laridagi Apollon ibodatxonasi “Andisha va g‘urur” (2005) filmida janob Darsining Elizabet Bennetdan birinchi bor qo‘lini so‘rash sahnasi uchun suratga olish joyi sifatida xizmat qilgan. Shiddatli yomg‘ir ostida tasvirga olingan bu sahna filmdagi eng esda qolarli lavhalardan biriga aylangan.
“Joker”
Joker zinapoyasi Nyu York shahridagi Bronks tumanida, Shekspir xiyoboni bilan Anderson xiyoboni oralig‘ida joylashgan. Aynan shu yerda Xoakin Feniks gavdalantirgan Artur Flek obrazi o‘zining mashhur raqsini ijro etgan sahna suratga olingan. Bu sahnada u yorqin kiyimda Geri Glitterning Rock and Roll Part 2 qo‘shig‘i ostida raqsga tushadi. Bu lavha filmning eng esda qolarli lahzalaridan biriga aylandi. Film ekranlarga chiqqandan so‘ng, bu joy sayyohlar va film muxlislar e’tiboriga tushdi.
“Dyuna”
Italiyaning San-Vito-d’Altivole shahrida joylashgan Brion yodgorligi “Dyuna: Ikkinchi qism” (2024) filmining asosiy joylaridan biriga aylandi. U Kayteyn sayyorasini — Imperium poytaxti hamda imperator Shaddam IV va malika Irulanning qarorgohi sifatida tasvirlandi. 1968—1978-yillarda Karlo Skarpa tomonidan loyihalashtirilgan bu me’moriy durdonadan suratga olish joyi sifatida foydalanish Brion oilasining maxsus ruxsati bilan amalga oshirildi. Ilgari kinoijodkorlarning bunday barcha so‘rovlari rad etilgan edi. Biroq Frenk Gerbertning romani va filmning birinchi qismining muxlisi bo‘lgan oila a’zolaridan biri loyiha haqida bilib qolgach, suratga olish uchun ruxsat berishga rozi bo‘ldi.
“Interstellar”
Islandiyadagi Vatnayokyudl milliy bog‘ida joylashgan Svinafetlsyokull muzligi Kristofer Nolan filmida doktor Mannning muz sayyorasiga aylandi — bu “Endyurens” jamoasi tashrif buyuradigan shafqatsiz, zulmatli dunyo. Svinafetlsyokull o‘zining g‘aroyib muzli relyefi va jonsiz manzaralari bilan hayot izlari bo‘lmagan uzoq sayyora muhitini ajoyib tarzda ifodaladi.
“Oq nilufar”
Taorminadagi San Domenico Palace mehmonxonasi HBO telekanalining “Oq nilufar” serialining ikkinchi mavsumida asosiy joy sifatida tasvirlangan. Ioniya dengiziga qaragan qoyada joylashgan bu hashamatli besh yulduzli mehmonxona dastlab XV asr monastiri bo‘lgan va 1896-yilda mehmonxonaga aylantirilgan. Serialda mehmonxona bosh qahramonlar boshidan kechirayotgan dramatik voqealar uchun fon vazifasini o‘taydi. Garchi serialdagi plyaj sahnalari mehmonxona yaqinida tasvirlangan bo‘lsa-da, aslida ular Taorminadan taxminan 2,5 soatlik masofada joylashgan Chefalu plyajida suratga olingan.
“Bridjertonlar”
Angliyadagi Bat shahrida joylashgan nafis Georgian uslubidagi Bofort maydoni ikki qavatli turar joylar va markaziy maysazor serialning turli sahnalari, jumladan qahramonlarning sayr qilish epizodlari uchun foydalanilgan. Misol uchun, birinchi mavsumda bu yerda Penelopa va Eloiza oqsochning homiladorligi haqida suhbatlashayotgan sahna suratga olingan. 1730-yilda barpo etilgan maydon Bat shahrining Qirollik teatri binosi yaqinida joylashgan bo‘lib, o‘zining XVIII asrga xos nafis me’morchiligi bilan ajralib turadi. Bu esa London ko‘chalarini tasvirlash uchun ajoyib fon vazifasini o‘tagan.
“Brijit Jons”
Londondagi Templ tumanining Middl-Templ-Leyn tor ko‘chasi Brijit Jons haqidagi filmlar turkumi muxlislari uchun ramziy joyga aylangan. Aynan shu ko‘cha Mark Darsi ishlaydigan idoraga olib boradi.
Izoh (0)