Hindistonda dunyoning eng keksa marafonchisi Fauja Singh 114 yoshida yo‘l-transport hodisasi oqibatida vafot etdi. Bu haqda Hindustan Times gazetasi xabar bermoqda.
Ma’lumotlarga ko‘ra, Beas qishlog‘ida yo‘lni kesib o‘tayotgan paytda Singhni avtomobil urib yuborgan. U Jalandhardagi xususiy shifoxonada vafot etgan.
Fauja Singh 1911-yil 1-aprelda tug‘ilgan va bolaligidanoq yugurishga qiziqib qolgan. 1990-yillarda u Buyuk Britaniyaga ko‘chib o‘tgan va 89 yoshida mashg‘ulotlarni qayta boshlagan. Singh faxriylar uchun xalqaro marafonlarda faol ishtirok etgan.
2003-yilda u Torontodagi marafonda 5 soat 40 daqiqada yugurib, o‘z yosh toifasida jahon rekordini o‘rnatgan. 2011-yilda u 100 yoshida marafon masofasini bosib o‘tgan dunyodagi eng keksa marafonchi sifatida Ginnesning rekordlar kitobiga kiritilgan.
Yanvar oyida Vengriyada Olimpiya o‘yinlari tarixidagi eng keksa sovrindor ayol Agnesh Keleti 104 yoshida vafot etgandi.
Izoh (0)