“Barselona” darvozaboni Mark-Andre ter Shtegen yozgi transfer oynasida klubni tark etishi mumkin. Bu haqda Ispaniyaning Diario Sport nashri xabar berdi.
Manbaga ko‘ra, Turkiyaning “Galatasaroy” klubi 33 yoshli germaniyalik darvozabon uchun to‘rt yillik shartnoma taklif qilgan. Taklif etilgan maosh miqdori “Barselona”dagi daromadidan yuqori. Biroq Istanbul klubi futbolchini faqat erkin agent sifatida o‘z tarkibiga qo‘shib olishni istamoqda.
Ter Shtegenning jamoani tark etishi ehtimoli yuqori, chunki u polshalik darvozabon Voytsex Shesnining yaxshi o‘yin ko‘rsatayotgani fonida “Barselona”ning ikkinchi raqamli posboniga aylangan. Bundan tashqari, “ko‘k-anorranglilar” yaqinda Joan Garsiyani xarid qilgani bois, klub rahbariyati ter Shtegenning xizmatlariga endi ehtiyoj yo‘qligini bildirgan. Shu sababli, futbolchi boshqa jamoaga o‘tishni rejalashtirmoqda.
Ma’lumot uchun, ter Shtegen 2014-yildan beri “Barselona” safida to‘p surmoqda. U o‘tgan mavsumda barcha musobaqalar doirasida atigi 9 ta o‘yinda maydonga tushib, 11 ta gol o‘tkazib yuborgan. Uning amaldagi shartnomasi 2028-yilgacha mo‘ljallangan.
Izoh (0)