Vengriyada Olimpiya o‘yinlari tarixidagi eng keksa sovrindor ayol Agnesh Keleti vafot etdi. 9 yanvar kuni u 104 yoshga to‘lishi kerak edi. Bu haqda Nemzeti Sport xabar berdi.
Keleti 25-dekabr kuni pnevmoniya tufayli yurak yetishmovchiligi va nafas olish qiyinligi bilan kasalxonaga yotqizilgan. 2-yanvar kuni ertalab u vafot etgan. Marhuma sport gimnastikasi bo‘yicha besh karra Olimpiya chempioni hisoblanadi. U 1940-yilda Vengriyaning birinchi chempionatida g‘olib chiqqan. Shundan keyin kelib chiqishi yahudiy bo‘lgani uchun unga har qanday sport bilan shug‘ullanishni taqiqlashgan.
Ikkinchi jahon urushidan so‘ng Agnesh Keleti yana sport bilan shug‘ullana boshladi va 1952-yilda o‘zining birinchi Olimpiada oltin medalini qo‘lga kiritgan. U jami 10 ta Olimpiada medaliga (beshta oltin, uchta kumush va ikkita bronza) hamda uchta jahon chempionati medali (bittadan oltin, kumush va bronza) sazovor bo‘lgan.
1957-yilda Keleti Isroilga ko‘chib o‘tgan, 2015-yilda esa o‘z vatani Budapesht shahriga qaytib kelgan. Sport faoliyatini tugatgach, Keleti Tel-Avivda jismoniy tarbiya bo‘yicha murabbiy sifatida ishlagan, milliy terma jamoaga rahbarlik qilgan. Bundan tashqari, u gimnastika musobaqalarida hakam sifatida ham taklif etilardi.
Izoh (0)