Kalendar avgust oyining o‘rtalarini ko‘rsatmoqda, hademay kuz fasli ham eshik qoqadi va jazirama kunlar salqin yomg‘irli havoga almashadi. Ammo kuz faslida ruhan umidsizlikka tushishga shoshilmang. Axir ushbu mavsumda ham eng go‘zal xotiralarni yaratish yoki shunchaki maroqli filmlarni tomosha qilish mumkin.
“Nyu Yorkda kuz” (2000)
Mazkur film, albatta, tomosha qilishga arziydi. Unda Nyu York markaziy bog‘ining kuzgi manzaralari, mahoratli aktyor Richard Gir va Vaynona Rayderning ajoyib obrazlaridan bahramand bo‘lishingiz mumkin.
Bosh qahramon Uill Keyn muvaffaqiyatli tadbirkor bo‘lib, tug‘ilgan kunini nishonlayotgan 22 yoshli Sharlotta bilan restoranda tanishib qoladi. Yoshdagi keskin farq — 26 yillik tafovutga qaramay, Keyn his-tuyg‘ulari chin ekanligiga ishonch hosil qiladi. Afsuski, Sharlotta jiddiy kasal bo‘ladi va yuragi bilan bog‘liq muammolar tufayli bir yil umri qolgan bo‘ladi.
“Faraxli noyabr” (2001)
Kianu Rivz va Sharliz Teron ishtirokidagi mashhur Amerika melodramasida voqealar kuzgi manzaralar fonida sodir bo‘ladi.
Nelson Moss ismli tadbirkor karyerasi uchun shaxsiy hayotini qurbon qiladigan reklama agenti bo‘lib ishlaydi. Kunlarning birida u shu paytgacha uchratgan hech qaysi ayolga o‘xshamaydigan Sara bilan tanishib qoladi. Ularning tasodifiy tanishuvi yana bir nechta uchrashuvlar bilan davom etadi. Quvnoq Sara Nelsonning hayotini tubdan o‘zgartiradi va Nelsonga hayotni va undan qanday zavqlanish kerakligini ko‘rsatadi. Biroq ajoyib sevgi haqidagi hikoya fojiali yakunlanadi.
“Tarjima mashaqqatlari” (2003)
Noodatiy melodrama klassik muhabbat hikoyasi emas, balki ikki kishi shunchaki birgalikda bo‘lgani tufayli baxtli bo‘lishlarini ifodalab beradigan filmdir. Undagi voqealar sentyabr va oktyabr oylarida Tokioda suratga olingan.
Sharlotta (Skarlett Yoxansson) va Bob (Bill Myurrey) bir-biridan tubdan farq qiladigan ikki inson bo‘lsa-da, ayni vaqtda ikkisi ham atrofdagi olamga nisbatan ishonchi juda pastdir. Ularning romantika bilan ishlari yo‘q, ikkisi shunchaki birgalikda vaqt o‘tkazishni yaxshi ko‘radi.
“Janob Morganning so‘nggi muhabbati” (2013)
Filmda go‘zal Parij shahrining kuzgi manzaralari aks etgan. Unda amerikalik keksa professor Metyu Morgan haqida hikoya qilinadi. Metyuning butun umr juda yaxshi ko‘rgan rafiqasi bir necha yil avval vafot etdi. Uning hayotida hech qanday mazmun qolmagandek tuyuladi. Ammo kunlarning birida u yosh, quvnoq va ochiqko‘ngil parijlik raqs o‘qituvchisi bilan tanishib qoladi. Polin Metyuni tushkunlikdan chiqishga va hayotga yana bir bor ijobiy kayfiyatda boqishga yordam beradi.
“Yoshlikka qaytib” (2014)
Yoshi 40 ga qarab ketgan Josh va Korneliya farzandli bo‘la olmaydi. Ularning ko‘p bolali do‘stlari esa er-xotindan uzoqlashib borayotganini his qiladi. Shu sababli ular yuragida o‘ti bor, yosh do‘stlarni izlashga tushadi va xayoli ajoyib g‘oyalarga to‘la yosh yigit va qiz bilan tanishadi va hayotlari o‘zgarib ketadi.
Izoh (0)