O‘zbekistonda 2025-yil I yarim yilligida yangi 48 771 nafar fuqaroga ijtimoiy to‘lovlar tayinlab berildi. Bu haqda Ijtimoiy himoya milliy agentligi xabar berdi. 

Ma’lum qilinishicha, agentlik tomonidan 2025-yil I yarim yilligida pensiya tayinlash uchun ish stajiga ega bo‘lmagan 48 771 nafar fuqaroga nafaqa, moddiy yordam va kompensatsiya pul to‘lovlari tayinlab berildi. Jumladan:

• 6 811 nafar fuqaroga — yoshga doir nafaqa;
• 16 014 nafar fuqaroga — nogironlik nafaqasi;
• 3 770 nafar oilaga — boquvchisini yo‘qotganlik nafaqasi;
• 14 115 nafar fuqaroga — nogironligi bo‘lgan 18 yoshgacha bolalarga nogironlik nafaqasi;
• 6 144 nafar fuqaroga — parvarishlash nafaqasi;
• 1 252 nafar fuqaroga — o‘zgalar parvarishiga muhtoj bo‘lgan yolg‘iz keksalar va o‘zgalar parvarishiga muhtoj yolg‘iz nogironligi bo‘lgan shaxslarga moddiy yordam;
• 612 nafar fuqaroga — uy-joy kommunal xizmatlar haqini to‘lash bo‘yicha kompensatsiya pul to‘lovlari tayinlab berildi;

Shuningdek:

• parvarishi va ta’minoti uchun to‘lov bilan qamrab olingan oilaga tarbiya (patronat)ga berilgan tutingan bolalar — 42 nafar;
• oilaviy bolalar uyi tutingan bolalar — 11 nafar.

2025-yil iyun oyida pensiya tayinlash uchun zarur ish stajiga ega bo‘lmagan 7 146 nafar fuqaroga nafaqa, moddiy yordam va kompensatsiya to‘lovlari tayinlab berildi. 

Jumladan:

• 864 nafar fuqaroga yoshga doir nafaqa;
• 2 500 nafar fuqaroga nogironlik nafaqasi;
• 452 nafar oilaga boquvchisini yo‘qotganlik nafaqasi;
• 2 105 nafar fuqaroga 18 yoshgacha bo‘lgan nogironligi bor bolalar uchun nafaqa;
• 895 nafar fuqaroga parvarishlash nafaqasi;
• 220 nafar fuqaroga o‘zgalar parvarishiga muhtoj yolg‘iz keksalar va nogiron shaxslar uchun moddiy yordam;
• 57 nafar fuqaroga uy-joy va kommunal xizmatlar xarajatlari uchun kompensatsiya;
• 42 nafar bola patronatga berilgan oilalarga parvarish va ta’minot xarajatlarini qoplash maqsadida to‘lov;
• 11 nafar bola oilaviy bolalar uylarida tutingan bolalar sifatida to‘lov bilan qamrab olingan.

Ma’lumot o‘rnida, 2025-yilning may oyida bu ko‘rsatkich 7 854 nafar fuqaroni tashkil etgan.

Bir martalik nafaqa to‘lovlari

2025-yil iyun oyida 32 184 ming nafar fuqaro uchun 37,2 mlrd so‘m bir martalik nafaqa to‘lovlari to‘lab berildi. Shundan:

• 19 702 nafar fuqaroga 15,9 mlrd so‘m — farzand tug‘ilganda beriladigan bir martalik (suyunchi) nafaqasi;
• 12 482 nafar fuqaroga 21,3 mlrd so‘m — dafn etish uchun nafaqasi to‘lab berildi.

May oyida 30 401 nafar fuqaroga bir martalik nafaqa to‘lovlari amalga oshirilgandi. Umumiy to‘lov miqdori 36,7 milliard so‘mni tashkil etgan. Bir oyda ko‘rsatkichda ortish kuzatilgan. 

Jumladan may oyida:

• 17 119 nafar fuqaroga 13,9 milliard so‘m miqdorida yangi tug‘ilgan farzand uchun bir martalik suyunchi nafaqasi;
• 13 282 nafar fuqaroga esa 22,8 milliard so‘m miqdorida dafn etish nafaqasi to‘lab berilgan edi.

Iyuldagi pensiyalar

Iyul oyi to‘lov ro‘yxatlariga kiritilgan 4,2 mln nafar pensiya oluvchi uchun talab etilgan mablag‘lar tijorat banklariga moliyalashtirilib berildi. 

O‘z navbatida pensiya to‘lovlarini naqd pulsiz shaklda oluvchi 3,5 mln nafar (yoki jami oluvchilarning 85 foizi) fuqaroning bank kartalariga mablag‘lar to‘liq yuklab berilishi ta’minlandi.

Amaldagi qonunchilik talablariga muvofiq pensiya pullarini naqd shaklda oluvchilarga pensiya pullari 4-iyul kunidan boshlab tasdiqlangan grafiklarga asosan Xalq bankining sayyor kassalari tomonidan yetkazib beriladi.

Ma’lumot uchun, 2025-yil 1-iyuldan respublikada pensiya va nafaqalar miqdorlari 10 foizga oshirildi. Yangi miqdorlar quyidagicha bo‘ladi:

• yoshga doir eng kam pensiya miqdori — oyiga 918 000 so‘m;
• nogironlik pensiyalarining eng kam miqdori — oyiga 1 012 000 so‘m;
• kam taʼminlangan oilalarga bolalar nafaqasining har oylik miqdori:
• 3 yoshgacha bo‘lgan bitta kichik farzandi uchun — 360 000 so‘m,
• 3 yoshdan 18 yoshgacha bo‘lgan bitta farzandi uchun — 275 000 so‘m;
• oilaning ikkinchi farzandi uchun qo‘shimcha — 165 000 so‘m;
• oilaning uchinchi va undan keyingi har bir farzandi uchun qo‘shimcha — 110 000 so‘m;
• kam taʼminlangan oilalar uchun moddiy yordamning oylik miqdori — 420 000 so‘m.

O‘zbekistonda pensiya tizimi va miqdori

Pensiya jamg‘armasi ro‘yxatidagi pensionerlar soni 4,2 mln nafarga yetgani haqida xabar berilgandi. O‘zbekistonda 2025-yil 1-iyuldan boshlab pensiyalar va nafaqalar 10 foizga oshirilishi e’lon qilingandi. Prezident farmoni ilovasida fuqarolarga to‘lanadigan barcha pensiyalar va nafaqalar miqdorlari keltirildi.

Unga ko‘ra:

• ish staji to‘liq bo‘lmagan chog‘dagi nogironlik pensiyasining eng kam miqdori — oyiga 1 012 000 so‘m;
• mehnatga layoqatsiz fuqarolarga beriladigan nogironlik nafaqasi va bolalikdan nogironligi bo‘lgan shaxslarga beriladigan nafaqa miqdori — oyiga 1 012 000 so‘m;
• 1941—1945-yillardagi urush oqibatida nogiron bo‘lgan shaxslar va uning qatnashchilari, shuningdek, fashistlar konslagerlarining voyaga yetmagan sobiq mahbuslari va Leningrad shahri qamal qilingan davrda ishlagan shaxslarning eng kam pensiya miqdori ustamalarni inobatga olgan holda — oyiga 4 462 000 so‘m;
• belgilangan yoshga doir eng kam pensiya miqdoridan (918 000 so‘mdan) 1 012 000 so‘mgacha pensiya oluvchilarning yoshga doir pensiyalari miqdori — oyiga 1 012 000 so‘m;
• zarur ish stajiga ega bo‘lmagan keksa yoshdagi fuqarolarga beriladigan nafaqa miqdori — oyiga 820 000 so‘m;
• ish staji to‘liq bo‘lmagan chog‘dagi yoshga doir pensiyaning eng kam miqdori qo‘shimcha to‘lovni hisobga olgan holda — oyiga 820 000 so‘m;
• o‘zgalar parvarishiga muhtoj nogironligi bo‘lgan 18 yoshgacha bolalarning parvarishi bilan band bo‘lgan bolaning qonuniy vakiliga beriladigan nafaqa miqdori — oyiga 820 000 so‘m;
• boquvchisini yo‘qotganlik nafaqasi oluvchilarning bir nafar mehnatga qobiliyatsiz oila a’zosi uchun nafaqa miqdori — oyiga 820 000 so‘m etib belgilanadi va keyingi har bir mehnatga qobiliyatsiz oila a’zosi uchun — 270 000 so‘mdan qo‘shiladi.

Prezident farmoniga ko‘ra, yoshga doir eng kam pensiya miqdori — oyiga 918 000 so‘m, nogironlik pensiyalarining eng kam miqdori — oyiga 1 012 000 so‘m bo‘ladi. 2025 yil 1-iyuldan boshlab pensiyani hisoblashning bazaviy miqdori — oyiga 471 000 so‘m etib belgilanadi.