O‘zbekistonda 2025-yildan boshlab har yili noyabr oyida “Eng namunali yashil turizm obyekti” tanlovi o‘tkaziladi. Bu haqda Vazirlar Mahkamasining 24-iyundagi qarorida belgilandi.
“Turizm obyektlari hamda joylashtirish vositalarida atrof-muhitga salbiy ta’siri kamaytirilgan mahsulotlardan foydalanish va ekologik talablarga muvofiq ko‘rsatiladigan xizmatlarni rag‘batlantirish chora-tadbirlari to‘g‘risida”gi qarorga ko‘ra, tanlovni o‘tkazishning asosiy maqsadlari:
- ekologiya va atrof-muuhitni muhofaza qilish hamda uninh chiqindilar bilan ifloslantirishining oldini olish;
- turizm obyektlarida plastik mahsulotlardan foydalanishni hamda plastik chiqindilarni kamaytirish;
- turizm obyektlarida bir martalik plastiklardan ekologik jihatdan zararsiz (bioparchalanuvchi) mahsulotlarga o‘tish va ulardan foydalanishni rag‘batlantirish;
- ekologik talablar hamda texnik jihatdan tartibga solish sohasidagi ekologik mezonlarga rioya etilishiga erishish;
- turizm obyektlarida ekologiya, atrof-muhitni muhofaza qilishga qaratilgan innovatsion yechimlar hamda iqtiqbolli tashabbuslani qo‘llab-quvvatlash.
Tanlov turizm obyektlatida bir martalik plastik mahsulotlardan foydalanishda ekologik jihatdan zararsiz (bioparchalanuvchi) mahsulotlarga o‘tish borasida yaxshi natijalarga erishgan, shuningdek, sohaga oid ilm-fan yutuqlarini amaliyotga joriy etib, zamonaviy texnologiyalardan samarali foydalangan holda o‘z faoliyatida chiqindilar hosil bo‘lishini kamaytirish ishlarida alohida tashabbus ko‘rsatgan tadbirkorlik subyektlari o‘rtasida o‘tkaziladi.
Tanlov hududiy saralash va respublika yakuniy bosqichlaridan iborat bo‘ladi. G‘oliblar maxsus komissiya tomonidan aniqlanadi. Hududiy komissiyalar tarkibi Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimliklarining turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosarlari tomonidan, respublika komissiyasi tarkibi esa ekologiya, atrof-muhitni muhofaza qilish va iqlim o‘zgarishi vaziri tomonidan tasdiqlanadi.
Tanlovning respublika yakuniy bosqichi g‘oliblari bir yo‘la to‘lanadigan quyidagi miqdordagi pul mukofoti bilan taqdirlanadi:
- 1-o‘rin — BHMning 150 baravari (1-avgustdan 61,8 million so‘m);
- 2-o‘rin — BHMning 100 baravari (41,2 million so‘m);
- 3-o‘rin — BHMning 50 baravari (20,6 million so‘m).
Sobrindorlarni taqdirlash, pul mukofoti, tanlovni tashkil etish va o‘tkazish bilan bog‘liq xarajatlar Ekologiya vazirligi huzuridagi Turizm qo‘mitasining byudjetdan tashqari Turizmni qo‘llab-quvvatlash jamg‘armasi mablag‘lari hisobidan moliyalashtiriladi.
Tanlov “O‘zbekiston–2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida”gi prezident farmoniga muvofiq sohada ekologik talablar asosida ko‘rsatiladigan xizmatlarni rag‘batlantirish maqsadida o‘tkaziladi.
Izoh (0)