TIV Isroil va Erondagi o‘zbekistonliklardan imkon qadar xavfsiz hududlarga chiqib ketishni so‘radi.
Vazirlik vakilining bildirishicha, Yaqin Sharqdagi vaziyatning shiddat bilan keskinlashayotgani chuqur xavotir uyg‘otmoqda. Shu munosabat bilan, O‘zbekiston fuqarolaridan Isroil va Eronga safar qilishdan tiyilish, ushbu mamlakatlarda bo‘lgan fuqarolardan esa imkon qadar xavfsiz hududlarga chiqib ketishlari so‘raldi.
“Xavfsizlikni ta’minlash maqsadida zarur choralar ko‘rilmoqda, fuqarolarimizdan hushyorlikni saqlashni va rasmiy e’lonlarni kuzatib borishni iltimos qilamiz”, dedi tashqi ishlar vaziri matbuot kotibi Ahror Burxonov.
TIV O‘zbekiston doimo mintaqadagi barcha tomonlarni o‘zaro muzokaralar orqali tinchlik yo‘lida harakat qilishga chaqirib kelganini eslatib o‘tdi.
18-iyun kuni O‘zbekistonning Isroildagi elchixonasi ushbu mamlakatni tark etish istagida bo‘lgan o‘zbekistonliklar qanday yo‘l bilan chiqib ketishi mumkinligi haqida ma’lumot bergandi. Hozirgi xavfsizlik vaziyati munosabati bilan Isroilni mustaqil ravishda tark etish istagida bo‘lgan O‘zbekiston fuqarolari quyidagi nazorat-o‘tkazish punktlari orqali chiqib ketishi mumkin:
- “Menaxem Begin” / “Taba” — Isroil—Misr chegarasida joylashgan (Isroilning Eylat va Misrning Taba shaharlari o‘rtasida);
- “Shayx Husayn” — Isroil—Iordaniya shimoliy chegarasida joylashgan (Isroilning Bayt Shean va Iordaniyaning Irbit shaharlari o‘rtasida);
- “Isxak Rabin” / “Vadi Arava” — Isroil—Iordaniya janubiy chegarasida joylashgan (Isroilning Eylat va Iordaniyaning Akaba shaharlari o‘rtasida).
Isroil Turizm vazirligi tomonidan mamlakatda vaqtinchalik bo‘lib turgan turistlar uchun xavfsiz tarzda chiqib ketish imkonini yaratish maqsadida maxsus raqamli ro‘yxatdan o‘tish shakli joriy qilindi. Elchixona mamlakatda murakkab vaziyat vujudga kelayotganini eʼtiborga olib o‘zbekistonliklarga shaxsiy xavfsizlik choralarini ko‘rish va raketa otishmalari paytida boshpanalarni tark etmaslikni muntazam tavsiya etib kelmoqda.
Erondagi elchixona ham xavfsizlik choralariga qat’iy rioya qilishga chaqirdi. O‘zbekistonning Tehrondagi elchixonasi vatandoshlarning xavfsiz harakatlanishini ta’minlash bo‘yicha doimiy aloqa va muvofiqlashtiruv ishlarini olib boryapti. Bugungi kunga qadar Erondan Turkmaniston orqali jami 60 ga yaqin O‘zbekiston fuqarolari vatanga qaytarildi.
Izoh (0)