Shavkat Mirziyoyev davlat tashrifi bilan Mo‘g‘ulistonga jo‘nab ketgandi. Prezident rafiqasi bilan birga ushbu mamlakatga yetib bordi.
Prezident matbuot xizmatining xabar qilishicha, ularni Mo‘g‘uliston tashqi ishlar vaziri Batmunx Batseseg va boshqa rasmiy shaxslar kutib oldi. Ikki mamlakat bayroqlari bilan bezatilgan “Buyant-Uxaa” aeroportida oliy martabali mehmonlar sharafiga faxriy qorovul saf tortdi.
Shavkat Mirziyoyev Mo‘g‘uliston prezidenti Uxnaagiyn Xurelsuxning taklifiga binoan 24-iyun kuni davlat tashrifi bilan ushbu mamlakatga keldi. Tashrifi arafasida 23-iyun kuni Ulan-Bator shahrida O‘zbekiston—Mo‘g‘uliston biznes-forumi bo‘lib o‘tdi. “O‘zbekiston — Buyuk Ipak yo‘li durdonasi” mavzusida O‘zbekiston—Mo‘g‘uliston turizm forumi o‘tkazildi.
Tashrif dasturiga muvofiq, Ulan-Bator shahrida ikki tomonlama uchrashuvlar va oliy darajadagi tadbirlar o‘tkazilishi ko‘zda tutilgan. Ko‘p qirrali O‘zbekiston—Mo‘g‘uliston munosabatlarini yanada rivojlantirish va amaliy hamkorlikni kengaytirish masalalari ko‘rib chiqiladi.
Mo‘g‘uliston yetakchisi Shavkat Mirziyoyev taklifiga binoan 2024-yil 23—26-iyun kunlari davlat tashrifi bilan O‘zbekistonda bo‘lgandi. Davlat rahbari Mo‘g‘uliston prezidentining ikki tomonlama munosabatlar tarixidagi birinchi tashrifi O‘zbekiston-Mo‘g‘uliston do‘stligini mustahkamlash va ko‘p qirrali hamkorlikni rivojlantirishga bo‘lgan o‘zaro intilishning tasdig‘i bo‘lganini qayd etgandi.
Tashrif davomida ikki davlat hamkorligini kengaytirishga qaratilgan 14 ta hujjat imzolangandi.
Izoh (0)