Aral Dream hamda O‘zbekiston Respublikasi Turizm va madaniy meros vazirligi tomonidan yaratilgan Orol dengizi muammosiga bag‘ishlangan “Sho‘rxok” yangi qisqa metrajli badiiy filmi namoyish etildi.
18 daqiqalik film Orol dengizining ajoyib tabiatini aks ettiradi. Uning yordami bilan siz mintaqa aholisining madaniyati va hayoti bilan yaqindan tanishishingiz, shuningdek, dengiz atrofida yashovchilar uchun qanday ahamiyatga ega ekanligini his qilishingiz mumkin.
Mazkur filmni “Issiq non”, “Abdulla Qodiriy” kabi filmlar orqali muxlislarga yaxshi tanish bo‘lgan rejissor Umid Hamdamov suratga olgan. Bastakor — Adham Abduraimov.
Filmning vizual poetikasini taniqli operator Jahongir Ibrohimov (“Ilhaq”, “O‘zbekistonlik”) yaratgan, prodyuserlar Muxlisa Azizova, Oybek Abdushukurov va Nikita Makarenko. Film g‘oyasi bosh vazir o‘rinbosari, turizm va madaniy meros vaziri Aziz Abduhakimovga tegishli.
“Sho‘rxok” filmida aktyor Erkin Bozorov, shuningdek, qoraqalpoq rassomlari Arzixan Naurizova va Alisher Akimov rol o‘ynagan.
“Sho‘rxok” filmining vazifasi jahon hamjamiyati e’tiborini Orolbo‘yi muammolariga qaratishdan iborat. Ingliz va rus tillaridagi subtitrlar bilan namoyish etilgan film xalqaro festivallarning tanlov dasturida ishtirok etadi. Uning xorijiy telekanallardagi namoyishlari muhokama qilinmoqda. Filmning premyerasi 1-oktabr kuni Berlinda “O‘zbekistonlik” xalqaro forumida bo‘lib o‘tgandi. Endi uni YouTube’da ham tomosha qilish mumkin.
“Sho‘rxok” filmi Turizm va madaniy meros vazirligi hamda Atrof-muhitni muhofaza qilish va ekologiya davlat qo‘mitasi ko‘magida tashkil etilgan Aral Dream xalqaro platformasining birinchi loyihalaridan biridir.
“araldream.com” veb-saytida test rejimida mavjud onlayn platforma Orolbo‘yi va Qoraqalpog‘istonni rivojlantirishga qaratilgan ijodiy loyihalarni birlashtiruvchi xabga aylanishi kerak. Platforma yordamida sayyoramizning har qanday fuqarosi o‘zi yoqtirgan loyihani moliyaviy qo‘llab-quvvatlashi mumkin bo‘ladi.
Izoh (0)