2025-yil 23-iyun kuni Centrum Air aviakompaniyasi O‘zbekiston va Rossiyaning asosiy shaharlari o‘rtasidagi parvozlar geografiyasini kengaytirishda davom etgan holda Samarqand – Vladivostok yo‘nalishi bo‘yicha ilk to‘g‘ridan-to‘g‘ri xalqaro parvozni muvaffaqiyatli amalga oshirdi.
Bungacha ushbu ikki shahar o‘rtasida to‘g‘ridan-to‘g‘ri aviaqatnovlar yo‘lga qo‘yilmagan edi. Yangi yo‘nalish Primorskiy o‘lkasi bilan O‘zbekiston o‘rtasida muhim havo koridorini ochadi va ishbilarmonlik, turistik hamda gumanitar safarlar uchun yanada qulay sharoitlar yaratishi kutilmoqda.
Parvozlar Airbus A320 laynerlarida haftasiga bir marta — dushanba kunlari amalga oshiriladi.
Vladivostok aeroportida ilk reysni kutib olish marosimida Rossiya Federatsiyasi Turizm vaziri hamda Transport vazirligi, O‘zbekiston Konsulxonasi vakillari hamda Primorskiy o‘lkasi gubernatori Oleg Kojemyako ishtirok etdi. Ishtirokchilar to‘g‘ridan-to‘g‘ri aviaqatnovning mintaqaviy hamkorlikni rivojlantirishdagi ahamiyatini alohida qayd etishdi.
2024-yil noyabr oyida Primorskiy o‘lkasi gubernatori Oleg Kojemyako rasmiy tashrif bilan O‘zbekistonda bo‘lgan edi. Tashrif davomida mintaqalararo hamkorlik, xususan, transport va turizm sohalarini kengaytirish istiqbollari muhokama qilingan.
Izoh (0)