Ulan Bator shahrida 23-iyun kuni “O‘zbekiston — Buyuk Ipak yo‘li durdonasi” mavzusida O‘zbekiston—Mo‘g‘uliston turizm forumi bo‘lib o‘tdi, deb xabar bermoqda “Daryo” muxbiri.
Forumda O‘zbekiston Turizm qo‘mitasi rahbariyati, Mo‘g‘uliston hukumati vakillari, ikki mamlakatning yetakchi sayyohlik agentliklari, mehmonxona tarmoqlari, aviakompaniyalar hamda turizm sohasi mutaxassislari va OAV vakillari ishtirok etdi.
Mazkur tadbir ikki davlat o‘rtasidagi madaniy va iqtisodiy aloqalarni mustahkamlash, ayniqsa, turizm sohasidagi hamkorlikni yangi bosqichga olib chiqishga xizmat qilishi ko‘zda tutilgan.
Tadbir doirasida O‘zbekistonning turizm salohiyatini aks ettiruvchi keng qamrovli taqdimotlar namoyish etildi. Yangi sayyohlik maskanlarining yaratilishi, zamonaviy infratuzilmalar, ekologik turizm, ziyorat turizmi, gastronomik yo‘nalishlar hamda festival va an’anaviy bayramlar orqali turizmni rivojlantirish bo‘yicha amalga oshirilayotgan ishlar yoritib berildi.
Ayniqsa, forum ishtirokchilarining e’tiborini O‘zbekistonning tarixiy shaharlari — Samarqand, Buxoro, Xiva, Shahrisabz va Toshkentdagi noyob me’moriy obidalar, YUNESKO merosi ro‘yxatiga kiritilgan qadimiy maskanlar, milliy hunarmandchilik markazlari va boshqa tarixiy-madaniy boyliklar tortdi.
Tadbir doirasida o‘tkazilgan “B2B” formatidagi uchrashuvlarda O‘zbekiston va Mo‘g‘ulistonning 150 ga yaqin turizm kompaniyalari vakillari ishtirok etib, o‘zaro hamkorlik yo‘nalishlarini muhokama qildi. Natijada ikki tomonlama shartnomalar imzolandi, qo‘shma loyihalarni amalga oshirish bo‘yicha dastlabki kelishuvlarga erishildi va sayyohlar almashinuvini oshirish rejalashtirildi.
Izoh (0)