Xitoy Eksimbanki O‘zbekistonga telekommunikatsiya rivoji uchun kredit ajratdi. Bu haqda Investitsiyalar, sanoat va savdo vazirligi xabar berdi.
Ma’lum qilinishicha, 21-iyun kuni vazirlik rahbari Laziz Qudratov Xitoy Eksport-import banki boshqaruvi raisi Chen Xuayyuy bilan uchrashuv o‘tkazdi, uning yakunida telekommunikatsiya sohasida 500 million AQSH dollariga teng miqdorda qarz shartnomasi imzolandi.
Laziz Qudratov loyiha tezkor va samarali amalga oshirilishining muhimligini ta’kidlab, IT sohasidagi loyihalarni Eksimbank tomonidan qo‘llab-quvvatlanishi ijobiy natijalar berishiga ishonch bildirdi.
Uchrashuv davomida amaldagi kelishuvlar ijrosi va yangi yo‘nalishlar bo‘yicha hamkorlik istiqbollari, jumladan, gidroenergetika obyektlari qurilishi, qishloq xo‘jaligi sohasining barqaror rivojlanishiga va transport infratuzilmasini modernizatsiya qilishga xizmat qiluvchi loyihalar muhokama qilingan.
2002-yildan buyon Xitoy Eksimbanki bilan hamkorlikda umumiy qiymati 3,2 milliard AQSH dollariga teng bo‘lgan 51 ta loyiha amalga oshirildi. Ular zamonaviy infratuzilma qurilishi, “yashil” energetika, transport, qishloq va suv xo‘jaligi, ta’lim, sog‘liqni saqlash va boshqa sohalarni qamrab olgan. Ayni paytda 1,9 milliard dollar qiymatidagi ikki loyiha amalga oshirilmoqda, 2,2 milliard dollar miqdoridagi 13 loyiha esa ko‘rib chiqilmoqda.
Milliy statistika qo‘mitasi ma’lumotlariga ko‘ra, 2025-yilning yanvar—aprel oylarida telekommunikatsiya xizmatlari hajmi 7,7 trln so‘mni tashkil etdi. Telekommunikatsiya xizmatlari hajmi 2024-yilning mos davriga nisbatan 14,4 foizga oshgan. 2024-yilning yanvar—aprel oylarida bu ko‘rsatkich 6,4 trillion so‘mni tashkil etgan.
2025-yildan O‘zbekistonda faoliyat yuritadigan, mobil yoki simli telekommunikatsiya tarmoqlariga ega telekommunikatsiya operatorlariga sinov tariqasida xalqaro Internet tarmoqlariga o‘z tijorat ehtiyojlari uchun to‘g‘ridan to‘g‘ri ulanish huquqi berildi.
Izoh (0)