Malayziya Eksimbanki rahbariyati bilan O‘zbekiston tijorat banklariga moliyaviy resurslarni ajratish va o‘zaro manfaatli hamkorlikni o‘rnatish masalasi muhokama qilindi. Bu haqda “Dunyo” axborot agentligi xabar berdi.
Ma’lum qilinishicha, O‘zbekiston elchixonasi rahbariyati Malayziyaning Eksimbank prezidenti va bosh ijrochi direktori Nurbayu binti Kasim Chang bilan uchrashdi. Unda O‘zbekistondagi xalqaro reytinglar va standartlarga javob beradigan moliyaviy barqaror bo‘lgan davlat va xususiy banklar bilan hamkorlik qilish to‘g‘risida fikr almashildi.
Eksimbankning o‘tgan yillar davomida islomiy bank yo‘nalishida erishgan ulkan tajribasini inobatga olib, Malayziya tomoniga O‘zbekiston moliyaviy sektoriga islomiy bank tizimi va sug‘urta (takaful) bozoriga birinchilardan bo‘lib kirish taklifi bildirildi.
Eksimbank prezidenti O‘zbekistonga investitsiya kiritishni rejalashtirayotgan Malayziya kompaniyalari bilan alohida uchrashuv o‘tkazish, har bir kompaniya loyihalarini batafsil tahlil qilgan holda, ularni qulay shartlardagi moliyaviy resurslar bilan ta’minlash masalasini o‘rganib chiqishga tayyorligini bildirdi.
Avvalroq Malayziya O‘zbekistonda islom sug‘urtasini joriy etish imkoniyatlarini ko‘rib chiqayotgani ma’lum qilingandi. Dastlabki bosqichda davlat sug‘urta kompaniyalari tarkibida alohida takaful xizmatlari tashkil etilib, bosqichma-bosqich xususiy sug‘urta kompaniyalarida ham yo‘lga qo‘yiladi.
Izoh (0)