“O‘zbekgidroenergo” tomonidan modernizatsiya loyihalari doirasida ikkita GES 28-dekabr kuni yangidan ish boshladi, deya “Daryo”ga xabar qilmoqda kompaniya axborot xizmati.
Qayd etilishicha, Toshkent GESlar kaskadi unitar korxonasi tarkibidagi GES-9 hamda Quyi-Bo‘zsuv GESlar kaskadi unitar korxonasi tarkibidagi GES-14’ning yangi quvvatlardagi rasmiy ochilish marosimi bo‘lib o‘tdi.
GES-9 – Toshkent GESlar kaskadi tarkibidagi GES hisoblanadi. U Chirchiq—Bo‘zsuv traktida Toshkent shahrida joylashgan bo‘lib, 1943-yilda ishga tushirilgan.
Ma’lum qilinishicha, uzoq yillar davomidagi ekspluatatsiya natijasida 75 yildan ortiq muddat davomida GESda o‘rnatilgan elektr qurilmalari, texnologik uskunalar moddiy va ma’naviy jihatdan eskirib, so‘nggi yillarda mazkur GES o‘rnatilgan quvvatlarda ishlamay qolgan edi.
Modernizatsiya natijasida stansiyada 1 dona gidroagregat o‘rniga har birining quvvati 8,3 megavattdan, umumiy quvvati 16,6 megavattga teng bo‘lgan, 2 dona gidroagregat o‘rnatildi. GES-9’da yangi 16,6 megavatt quvvatli gidroagregatlarni o‘rnatish loyihasini amalga oshirish natijasida yillik elektr energiya ishlab chiqarish ko‘rsatkichi 95,0 million kilovatt soatni tashkil etadi. Bu o‘z navbatida ishlab chiqarish quvvatlarini qariyb 2 barobarga oshiradi.
Yangi loyiha ishga tushirilishi natijasida Toshkent shahrining 60–70 mingga yaqin aholi xonadonlarining elektr energiyasiga bo‘lgan talabini GES-9 orqali qoplashga erishiladi.
Shuningdek, modernizatsiya loyihalari doirasida Quyi-Bo‘zsuv GESlar kaskadi unitar korxonasi tarkibidagi GES-14’da olib borilgan modernizatsiya jarayonlari muvaffaqiyatli yakunlanib, yangi quvvatlarda ishlay boshladi.
GESning rasmiy ochilish marosimida “O‘zbekgidroenergo”ning mas’ul xodimlari, kaskad rahbariyati va xitoylik hamkorlar ishtirok etdi.
GES-14 Quyi-Bo‘zsuv GESlar kaskadi tarkibidagi 1-stansiya hisoblanib, Bo‘zsuv kanalida Toshkent shahridan 15 kilometr uzoqda joylashgan bo‘lib, 1944-yilda ishga tushirilgan.
Modernizatsiya doirasida stansiyada 2007-yildan beri ishlamay kelgan 1 dona 10,7 megavatt quvvatli gidroagregat o‘rniga quvvati 7,5 megavattdan, umumiy quvvati 15 megavattdan iborat 2 dona gidroagregat o‘rnatildi. Ularning yillik elektr energiya ishlab chiqarish ko‘rsatkichi 90,7 million kilovatt soatni tashkil etadi.
Yangi 15 megavatt quvvatli gidroagregatlarni o‘rnatish loyihasini amalga oshirish natijasida GES-14 quvvati 4,3 megavattga oshirilib, yillik elektr energiya ishlab chiqarish ko‘rsatkichining ortishi kutilmoqda.
Yangi loyiha ishga tushirilishi natijasida Toshkent viloyatining 50–60 mingga yaqin xonadonlarining elektr energiyasiga bo‘lgan talabini GES-14 orqali ta’minlashga erishiladi.
“O‘zbekgidroenergo” tomonidan Toshkent GESlar kaskadi (GES-9) hamda Quyi-Bo‘zsuv GESlar kaskadi (GES-14) modernizatsiyasi investitsiyaviy loyihalari Xitoyning “Eksimbank” kreditini jalb qilgan holda amalga oshirildi.
Modernizatsiya ishlari jamiyatning nufuzli xorijiy hamkori, loyihaning bosh pudratchi tashkiloti hisoblangan Xitoyning Power Construction of China Ltd kompaniyasi bilan hamkorlikda amalga oshirildi.
GESlarda yangi o‘rnatilgan texnologik jihozlar aqlli avtomatlashtirilgan boshqaruv tizimiga ulandi. Bu, o‘z navbatida, elektr qurilmalarini zamonaviy kuzatuv kameralari orqali real vaqt rejimida masofadan kuzatish imkoniyatini beradi.
“O‘zbekgidroenergo” tomonidan 2020-yilda umumiy quvvati 118,3 megavatt bo‘lgan 6 ta investitsiya loyihalari doirasida 2 ta yangi GES va 4 ta modernizatsiya doirasidagi GESlar yangi quvvatlarda foydalanishga topshirildi.
2020-yilda amalga oshirilgan investitsiya loyihalari doirasida 543 million kilovatt soat elektr energiyasini ishlab chiqarilishiga zamin yaratiladi. Mazkur loyihalarning ishga tushirilishi natijasida qo‘shimcha 220 dan ortiq yangi ishchi o‘rinlari yaratildi.
Avvalroq Qashqadaryodagi Oqsu daryosida GES qurilishi hamda Qibrayda 1933-yilda qurilgan Qodiriya GES modernizatsiya qilingani hamda xabar berilgandi.
Izoh (0)