Deputatlar o‘rta ta’lim maktablarini yetarli miqdorda laboratoriya jihozlari bilan ta’minlash hamda eskirgan o‘quv uskunalarini almashtirish bo‘yicha mablag‘larni ko‘paytirishni talab qildi. Bu haqda “Daryo”ga Oliy Majlis Qonunchilik palatasi matbuot xizmati xabar berdi.
Qayd etilishicha, Parlament majlisida “2020-yil uchun O‘zbekiston Respublikasining Davlat budjeti to‘g‘risida”gi qonun loyihasi birinchi o‘qishi jarayonida deputatlar qonun loyihasida umumta’lim maktablarini jihozlash uchun ajratilishi ko‘zda tutilgan 97 milliard so‘m mablag‘ yetarli emasligini bildirgan.
Hukumat a’zolari bilan kechgan muhokama va muzokaralardan so‘ng parlament a’zolari tomonidan ko‘tarilgan bu masala hal etilishi bildirilgan.
Qonun loyihasini ikkinchi o‘qishdagi muhokamalar chog‘ida 2020-yil uchun Davlat budjeti loyihasiga umumta’lim maktablarini jihozlash qo‘shimcha ravishda davlat boshqaruv organlari xarajatlarini maqbullashtirish hisobidan 50 milliard so‘m mablag‘ ajratilishi ma’lum qilangan.
Ma’lumot uchun, Koreya Respublikasi bilan imzolangan kelishuvga asosan, Janubiy Koreyaning Eksport-import banki (Eksimbank) tomonidan ajratilgan 33 million dollar miqdoridagi imtiyozli kredit mablag‘lari hisobiga umumta’lim maktablari uchun 2 859 dona sinf komplekt kompyuter sinflarini jihozlash ko‘zda tutilmoqda. 2020-yilning yakuniga qadar barcha kompyuter sinflari yetkazib berilishi rejalashtirilgan.
Shu bilan birga, 2020-yilning 1-martiga qadar umumta’lim maktablarini jihozlash bo‘yicha 5 yilga mo‘ljallangan alohida dastur ishlab chiqilishi aytilgan.
Izoh (0)