Namangan viloyatining Uchqo‘rg‘on tumanida Katta Farg‘ona kanaliga qurilgan kichik GES kaskadlari ishga tushirildi. Bu haqda “Daryo”ga viloyat hokimligi axborot xizmati ma’lum qildi.
Shu munosabat bilan o‘tkazilgan marosimda viloyat hokimi Xayrullo Bozorov, Xitoyning O‘zbekistondagi elchisi Szyan Yan, “O‘zbekgidroenergo” aksionerlik jamiyati mutasaddilari, xitoylik hamkorlar vakillari, jurnalistlar ishtirok etdi.
Umumiy qiymati 31 million AQSH dollariga teng bo‘lgan mazkur loyiha “O‘zbekgidroenergo” AJning 22,3 million dollar mablag‘i hamda Xitoy “Eksimbank”i tomonidan ajratilgan kredit hisobiga qurib bitkazildi. Loyihaning o‘zini o‘zi qoplash muddati 8,5 yil deb belgilangan.
6 megavattlik ikki kichik GESdan iborat kaskad Katta Farg‘ona kanalining PK-142 hamda PK-184 uchastkalari oralig‘ida barpo etildi.
Ushbu kichik GES kaskadlari ishga tushishi natijasida Namangan viloyatida elektr energiyasi ishlab chiqarish yiliga 72,89 million kilovatt-soatga ortadi. Uchqo‘rg‘on tumanidagi 48 ming xonadon ekologik toza texnologiyalarda ishlab chiqarilgan elektr energiyasi bilan ta’minlanadi.
Izoh (0)