Respublika Yo‘l harakati xavfsizligi xizmati boshlig‘i Sherzod Ibragimov Gazeta nashri jurnalisti Mirolim Isojonovga savol ketidan savol berish o‘rinsiz ekanini aytib, dakki berdi. Ammo mansabdor birinchi savolga ham aniq javob berishdan “qochdi”. Bu haqda “Daryo” jurnalisti xabar berdi.
Bugun, 13-iyun kuni Ichki ishlar vazirligi, Jamoat xavfsizligi departamenti Yo‘l harakati xavfsizligi xizmati tashabbusi bilan tashkil etilgan press-tur davomida xizmat boshlig‘i Sherzod Ibragimov ishtirokida matbuot anjumani ham bo‘lib o‘tdi.
Matbuot anjumanida so‘z olgan “Daryo” jurnalisti Sherzod Ibragimovga yuzlanib, AOKAda masʼullar ishtirokida bo‘lib o‘tgan matbuot anjumanida O‘zbekistonda bolalar o‘limi bilan bog‘liq YTHlar soni 2024-yilda 2023-yilga nisbatan ancha kamaygani aytilgani, ammo raqamlarni ochiqlashga kelganda masʼullar sukut saqlanayotganini aytib, aniq raqamlar qanchani ko‘rsatishi bilan qiziqdi.
Mansabdor jurnalist savoliga javob berar ekan, aniq javobdan tiyilishga urindi. Shunda Gazeta nashri jurnalisti Mirolim Isajonov “raqamlar qo‘rqinchlimi, nima uchun aniq raqamlarni ochiqlamayapsiz, qilinayotgan ishlar natija berayotgan bo‘lsa, raqamlarni ochiqlash kerak”, dedi.
Yo‘l harakati xavfsizligi xizmati boshlig‘i Sherzod Ibragimov gapni aylantirmasdan aniq raqamlarni ochiqlashni so‘ragan jurnalistni madaniyatsizlikda ayblab, dakki berdi.
Savoldan savolga... Menimcha, madaniyatga rioya qilsak. Biz savol-javobimizni tugatsak, keyin sizga savol berishga yana imkoniyat beriladi. O‘zimizning qaysi darajada ekanligimizni, professionalizmimizni ko‘rsataylik, dedi mansabdor jurnalistga dakki berar ekan.
Nashr vakili esa uning savoli ham shu savol bilan uzviy bog‘liqligini qo‘shimcha qildi. Biroq mansabdor na u savolga va na dastlabki savolga aniq javob berdi. Raqamlarni ochiqlashdan tiyildi.
Bolalar o‘limiga sabab bo‘lishi mumkin bo‘lgan barcha omillar tahlil qilib chiqilgan. Bu o‘sha maktablarning oldi yoki maktabdan chiqib, toki o‘sha farzandlarimiz uyigacha boradigan marshrutlari bor, to‘g‘rimi? Mana shularning barchasi tahlil qilib chiqilgan. Kuni kecha biz o‘sha bolalar bo‘yicha ombudsman vakillari bilan ham uchrashuv o‘tkazdik. Bu bo‘yicha ham mavjud muammolar yoki qilinishi kerak bo‘lgan, bartaraf qilinishi kerak bo‘lgan ishlarning hammasini gaplashib oldik. Endi bolalar o‘limi kamayishi yoki uni aynan raqamlar masalasi qiziqtiradigan bo‘lsa, men boshida aytdimki, shu raqamlarning hammasi mavjud. Bolalar o‘limining oldini olish bo‘yicha qilinayotgan ishlarimiz ham mavjud. Bu borada endi hozir yonimizda yo‘q, lekin bevosita kelib, bu masala bo‘yicha qandaydir bir yondashilsa bizda cheklov yo‘q. Eshiklarimiz yopiq emas, dedi Sherzod Ibragimov.
Izoh (0)