Qashqadaryo viloyatining Shahrisabz tumanida sobiq IIB xodimi, YPX inspektori pichoqlab o‘ldirildi. Bu haqda Telegramʼdagi “Avtoblog.uz” kanali xabar berdi.
Maʼlum bo‘lishicha, voqea 2025-yilning 1-iyun kuni sodir bo‘lgan.
O‘ktam aka Shahrisabz shahrida YPX katta inspektori bo‘lib ishlagan. 2014-yilda nafaqaga chiqqandi, deydi bloger Maqsud Muzaffarov.
Aniqlashtirilishicha, qotillik voqeasi Shahrisabz shahri hududidagi “Sinabog‘” mahallasida sodir bo‘lgan.
O‘ktam akani qishloq odamlari Ivan deb atovchi shaxs pichoqlagan. Kelishmovchilik nimadan kelib chiqqani nomaʼlum, deydi “Daryo”ning boshqa manbasi.
Shahrisabz shahridagi ushbu mahallada yashovchi Elshod Yahyo ismli Facebook foydalanuvchisi ushbu voqea haqida yozar ekan “Qachonlardir bizning mahalla shahrimizni titratgan, mafiya va bezorilar makoni bo‘lgani sababli birorta begona odam mahallaga o‘zidan o‘zi kelishi, yurishi mumkin bo‘lmagan. Afsuski, o‘sha eski qon hamon oqayotgandek, baʼzida o‘zganing, baʼzan o‘z qonini to‘kib turishadi”, deydi.
Bosh prokuratura axborot xizmati rahbari Hayot Shamsutdinovning “Daryo”ga bildirishicha, qotillik oqibatida vafot etgan fuqaro 48 yoshda bo‘lgan.
2025-yil 1-iyun kuni Shahrisabz shahri “Sinabog‘” mahallasida yashagan O‘ktam Xo‘jaqulov bo‘yin sohasidan o‘tkir tig‘li jism bilan tan jarohati yetkazilgan holda Shahrisabz shahar tez tibbiy yordam bo‘limiga qotillik alomatlari bilan olib kelingan. Mazkur holat yuzasidan Shahrisabz tumani prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, 37 yoshli gumonlanuvchi shaxs Jinoyat-protsessual kodeksining 221-moddasi tartibida ushlangan, deyiladi Bosh prokuratura axborotida.
Avvalroq Toshkent viloyatining Toshkent tumanida, shuningdek, Toshkent shahrining Yangihayot tumanida o‘z xizmat vazifasini bajarayotgan profilaktika inspektorlari pichoqlanishi bilan bog‘liq holat sodir bo‘lgandi. Qolaversa, Jizzax viloyatining Baxmal tumanida ham aliment pulini undirish uchun borgan MIB xodimi pichoqlangandi.
Izoh (0)