Республика Йўл ҳаракати хавфсизлиги хизмати бошлиғи Шерзод Ибрагимов Газета нашри журналисти Миролим Исожоновга савол кетидан савол бериш ўринсиз эканини айтиб, дакки берди. Аммо мансабдор биринчи саволга ҳам аниқ жавоб беришдан “қочди”. Бу ҳақда “Дарё” журналисти хабар берди.
Бугун, 13 июнь куни Ички ишлар вазирлиги, Жамоат хавфсизлиги департаменти Йўл ҳаракати хавфсизлиги хизмати ташаббуси билан ташкил этилган пресс-тур давомида хизмат бошлиғи Шерзод Ибрагимов иштирокида матбуот анжумани ҳам бўлиб ўтди.
Матбуот анжуманида сўз олган “Дарё” журналисти Шерзод Ибрагимовга юзланиб, АОКАда масъуллар иштирокида бўлиб ўтган матбуот анжуманида Ўзбекистонда болалар ўлими билан боғлиқ ЙТҲлар сони 2024 йилда 2023 йилга нисбатан анча камайгани айтилгани, аммо рақамларни очиқлашга келганда масъуллар сукут сақланаётганини айтиб, аниқ рақамлар қанчани кўрсатиши билан қизиқди.
Мансабдор журналист саволига жавоб берар экан, аниқ жавобдан тийилишга уринди. Шунда Газета нашри журналисти Миролим Исажонов “рақамлар қўрқинчлими, нима учун аниқ рақамларни очиқламаяпсиз, қилинаётган ишлар натижа бераётган бўлса, рақамларни очиқлаш керак”, деди.
Йўл ҳаракати хавфсизлиги хизмати бошлиғи Шерзод Ибрагимов гапни айлантирмасдан аниқ рақамларни очиқлашни сўраган журналистни маданиятсизликда айблаб, дакки берди.
Саволдан саволга... Менимча, маданиятга риоя қилсак. Биз савол-жавобимизни тугатсак, кейин сизга савол беришга яна имконият берилади. Ўзимизнинг қайси даражада эканлигимизни, профессионализмимизни кўрсатайлик, деди мансабдор журналистга дакки берар экан.
Нашр вакили эса унинг саволи ҳам шу савол билан узвий боғлиқлигини қўшимча қилди. Бироқ мансабдор на у саволга ва на дастлабки саволга аниқ жавоб берди. Рақамларни очиқлашдан тийилди.
Болалар ўлимига сабаб бўлиши мумкин бўлган барча омиллар таҳлил қилиб чиқилган. Бу ўша мактабларнинг олди ёки мактабдан чиқиб, токи ўша фарзандларимиз уйигача борадиган маршрутлари бор, тўғрими? Мана шуларнинг барчаси таҳлил қилиб чиқилган. Куни кеча биз ўша болалар бўйича омбудсман вакиллари билан ҳам учрашув ўтказдик. Бу бўйича ҳам мавжуд муаммолар ёки қилиниши керак бўлган, бартараф қилиниши керак бўлган ишларнинг ҳаммасини гаплашиб олдик. Энди болалар ўлими камайиши ёки уни айнан рақамлар масаласи қизиқтирадиган бўлса, мен бошида айтдимки, шу рақамларнинг ҳаммаси мавжуд. Болалар ўлимининг олдини олиш бўйича қилинаётган ишларимиз ҳам мавжуд. Бу борада энди ҳозир ёнимизда йўқ, лекин бевосита келиб, бу масала бўйича қандайдир бир ёндашилса бизда чеклов йўқ. Эшикларимиз ёпиқ эмас, деди Шерзод Ибрагимов.
Изоҳ (0)