Toshkent yo‘llarida yana bir yo‘l chizmasi sinov tariqasida yotqizilmoqda, deb xabar bermoqda poytaxt IIBB matbuot xizmati.
Avval xabar berilganidek, shahar yo‘llarida tirbandlik bilan kurashish uchun sinov tariqasida yangi yo‘l chizmasi joriy etildi. Tashqi ko‘rinishi sababli xalq tilida “vafli chizmasi”dagi chiziqlar yordamida harakat yo‘nalishida tirbandlik yuzaga chiqqan holatda chiqish mumkin bo‘lmagan hudud belgilab olinadi va haydovchi to‘xtashga majbur bo‘ladi.
Xalqaro tajribaga ko‘ra, ushbu chizmaning yana bir turi bor. U Amir Temur va Osiyo ko‘chalari kesishmasida (“Qozog‘iston” kinoteatri) yotqizildi. Chizma chorraha chegarasini belgilaydigan ikki sariq rangdagi chiziqlarning kesishmalaridan iborat.
“Qayd etish lozimki, ikki turdagi chizmaning talablari bir xil: yo‘llardagi tirbandliklar bilan kurashish. Ushbu muammo chorrahalarda svetofor ishlamagan hollarda yaqqol ko‘zga tashlanadi. Hattoki YPX inspektori tomonidan harakat oqimi boshqarilib turganda ham ba’zi avtomobilchilar tegishli ishorani kutib turmasdan “o‘tib ketmoqchi” bo‘lishadi.
Bu esa avtomobillarning tiqilib qolishiga va kesib o‘tayotgan ko‘chalaridan harakatlanishni boshlagan mashinalarni yo‘li to‘sib qo‘yilishiga olib keladi. Natijada holat ushbu chorrahani kesib o‘tmoqchi bo‘lgan barcha haydovchilar uchun muammoga aylanadi, uni hal qilish uchun esa qo‘shimcha vaqt talab etiladi”, — deyiladi IIBB xabarida.
Shuningdek, xabarda qayd etilishicha, bir nechta katta chorrahalarda sinov chizmalaridan tashqari o‘ng tomonga buriluvchilar uchun “cho‘ntaklar” tashkil etilib, chorrahalardagi holat yanada yengillashadi. Ushbu imkoniyatlarni tashkil etish bo‘yicha ishlar olib borilmoqda. Bundan tashqari, hozirning o‘zida ko‘plab chorrahalarda chizmalar o‘ng tomonga burilish uchun imkon qoldirilgan holda yotqizilmoqda.
Izoh (0)