Andijon viloyati Shahrixon tumanida bola o‘g‘risi ushlangani haqida xabarlar tarqaldi. Viloyat IIB matbuot xizmati buni rad etdi.
Qayd etilishicha, ijtimoiy tarmoqlarda tarqalgan videodagi holat o‘rganilganda 31-iyul kuni Shahrixon tumanidagi xonadonga noma’lum shaxs kirib olgani, xonadon egasi shu kuni soat 15:40 larda “102” qisqa raqamiga bu haqda xabar bergani aniqlandi.
Hudud profilaktika inspektori voqea joyiga borib, holatga oydinlik kiritganda, ushbu fuqaro shu tumandagi boshqa mahallada yashovchi, 2019-yildan buyon ruhiy kasalliklar (D) ro‘yxatida turuvchi, 1986-yilda tug‘ilgan, ruhiy nosog‘lom fuqaro ekani ma’lum bo‘lgan. Ushbu fuqaro hudud profilaktika inspektori tomonidan shu kunning o‘zida Andijon viloyati psixonevrologiya dispanseriga davolanish uchun joylashtirilgan.
“Ijtimoiy tarmoqlar orqali bola o‘g‘risi ushlangani to‘g‘risida tarqatilayotgan xabarlar mutlaqo asosga ega emas”, deyiladi xabarda.
Andijon viloyati IIB haqiqatga to‘g‘ri kelmaydigan ma’lumotlarni tarqatmasliklarini so‘radi.
Bola o‘g‘rilari haqida asossiz xabarlar tarqalishi birinchisi emas. Surxondaryoda ham bola o‘g‘rilarini ushlashgani haqida xabarlar tarqalgandi. O‘rganishlar natijasi ushbu xabarlar asossiz va haqiqatdan yiroq ekani ma’lum bo‘lgan.
Izoh (0)