Rossiyaga ishlashga ketib, qiyin ahvolga tushib qolgan o‘zbekistonlik ayol vatanga qaytarildi, deb xabar bermoqda “Dunyo” AA.
Qayd etilishicha, mamlakatning Rostov-Don shahridagi Bosh konsulxonasi ko‘magida Rossiyaning Krasnodar o‘lkasida qiyin ahvolda qolgan o‘zbekistonlik B.E. O‘zbekistonga qaytarildi. U 2020-yil fevral oyida Krasnodar o‘lkasiga ishlash maqsadida kelgan va turli mavsumiy ishlarda mehnat qilgan.
Biroq ko‘p o‘tmay koronavirus pandemiyasi oqibatida ishsiz va mablag‘larsiz qiyin ahvolga tushib qolgan. Shuningdek, u mehnat faoliyatini amalga oshirish davrida barcha hujjatlarini yo‘qotgan. O‘z murojaatida hujjatlarini rasmiylashtirish va O‘zbekistonga qaytarishda amaliy ko‘mak so‘ragan.
Bosh konsulxona tomonidan unga Vatanga qaytish guvohnomasi rasmiylashtirildi va Migratsiya agentligining Krasnodar o‘lkasidagi vakolatxonasi ko‘magida aviachipta xarid qilib berildi. U kuni kecha O‘zbekistonga kuzatib qo‘yildi.
O‘zbekistonga qaytarilayotgan fuqarolar
2025-yilning boshlarida Rossiyaning Tiva Respublikasi Oq Dovurak shahrida vaqtincha ishlayotgan to‘rt nafar O‘zbekiston fuqarosi vatanga qaytarildi. Fuqarolarning yashash joyida sodir bo‘lgan kuchli yong‘in natijasida ularning hujjatlari, shu jumladan, pasportlari yo‘qolgan.
27-fevral kuni Makkada og‘ir kasallikka chalingan o‘zbekistonlik vatanga qaytarildi. Fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarildi.
2025-yil 5-mart kuni Rossiyaning Vladivostok shahrida og‘ir tan jarohati olgan O‘zbekiston fuqarosi vatanga qaytarildi. Mart oyining o‘rtalarida Novosibirskdagi Bosh konsulxonasi ko‘magida Rossiyaning Saxa respublikasi Neryungri shahrida qiyin hayotiy vaziyatga tushib qolgan ona va uning to‘rt nafar farzandi O‘zbekistonga qaytarildi. 17-mart kuni ota-ona qaramog‘isiz qolgan 10 nafar voyaga yetmagan bola Qozog‘istondan O‘zbekistonga qaytarildi. Shuningdek, Rossiyada ota-ona qaramog‘isiz qolgan 30 nafar bola O‘zbekistonga qaytarildi.
14-iyun kuni Turkiyada o‘gay otasi jinsiy tajovuz qilgan o‘zbekistonlik qiz vatanga qaytarildi. 20-iyunda esa Ummonda tutqunlikda saqlangan ayol bolalari bilan O‘zbekistonga qaytarildi.
21-iyunda Erondagi 60 ga yaqin O‘zbekiston fuqarolari Turkmaniston orqali vatanga qaytarilgan.
Izoh (0)