Joriy yil 1-avgustdan O‘zbekistonda bazaviy hisoblash miqdori 10 foiz oshirilib, 412 ming so‘m etib belgilandi (avval 375 ming so‘m edi). Bu yo‘l harakati qoidalarini buzganlik uchun jarimalar ko‘tarilishiga olib keladi.
“Maʼmuriy javobgarlik to‘g‘risida”gi kodeksga ko‘ra, haydovchi yo‘l harakati qoidalarini buzgan taqdirda unga turli miqdorlarda jarimalar qo‘llanadi. “Daryo” ulardan ayrimlarini yangi qiymati qanchadan to‘g‘ri kelishini hisoblab chiqdi.
Belgilangan harakat tezligini soatiga 20 kilometrdan ko‘p bo‘lmagan kattalikda oshirish BHMning 1 baravari (412 ming so‘m) miqdorida jarimaga tortiladi.
Belgilangan harakat tezligini soatiga 20 kilometrdan ortiq, lekin 40 kilometrdan ko‘p bo‘lmagan kattalikda oshirish BHMning 5 baravari (2 million 60 ming so‘m) miqdorida jarima yoziladi.
Belgilangan harakat tezligini soatiga 40 kilometrdan ortiq kattalikda oshirish BHMning 9 baravari (3 million 708 ming so‘m) miqdorida jarima qo‘llanilishiga sabab bo‘ladi.
Eng yuqori jarimalardan biri avtotransport vositasini mast holda boshqarganlik uchun BHMning 25 baravari, yaʼni 10 million 300 ming so‘m jarima belgilangan. Avtomobil oynasini texnik reglamentga mos bo‘lmagan tartibda, tegishli ruxsatnomasiz qoraytirish (tonirovka) uchun ham shuncha miqdorda jarima yoziladi.
Xuddi shunday huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilgan bo‘lsa, BHMning qirq baravari miqdorida (16 million 480 ming so‘m) jarima solishga sabab bo‘ladi.
• Yo‘l-transport hodisasi yuz bergan joydan ketib qolish BHMning 15 baravari (6 million 180 ming so‘m) miqdorida;
• Avtotransportni boshqarish huquqi bo‘lmagan shaxslarning shu vositalarni boshqarishi BHMning 5 baravari (2 million 60 ming so‘m) miqdorida;
• Avtotransportni boshqarish vaqtida telefondan foydalanish BHMning 3 baravari (1 million 236 ming so‘m) miqdoridagi jarimaga sabab bo‘ladi.
Kodeksda yana ko‘plab yo‘l harakati qoidabuzarliklari uchun jarimalar belgilangan. Jumladan, to‘xtash yoki to‘xtab turish qoidalarini buzganlik uchun BHMning 2 baravari (824 ming so‘m) miqdorida jarima yoziladi. Temiryo‘lning o‘tish joylaridan o‘tish qoidalarini buzganlik uchun BHMning 3 baravari (1 million 236 ming so‘m) miqdorida jarima qo‘llaniladi. Bunda haydovchi transportni boshqarish huquqidan 1 yil-u 6 oydan 3 yilgacha mahrum qilinadi.
Shu bilan birga, yo‘llarda guruh bo‘lib harakat qilishda qatnashish BHMning 3 baravari, svetoforning taqiqlovchi signalida to‘xtash chizig‘ini bosib kirish BHMning ikkidan bir qismi (206 ming so‘m) miqdorida jarima qo‘llashga sabab bo‘ladi.
Agar haydovchi svetoforning taqiqlovchi signaliga yoki yo‘l harakatini tartibga soluvchining taqiqlovchi ishorasiga bo‘ysunmasdan o‘tsa, unga nisbatan BHMning 2 baravari (824 ming so‘m) miqdorida jarima yoziladi.
Kodeksda yana kichikroq miqdordagi jarimalar ham ko‘plab qoidabuzarliklar uchun belgilab qo‘yilgan. Masalan, avtomobil tovush signalini sababsiz chalganlik uchun BHMning 1 baravari (412 ming so‘m) miqdorida, avtotransportni piyodalar yo‘lkalaridan yurgizganlik uchun BHMning ikkidan bir qismi (206 ming so‘m) miqdorida jarima bor.
Yo‘l belgilari yoki yo‘lning qatnov qismidagi chiziqlar bilan belgilab qo‘yilgan talablarga rioya etmaslik yoki avtotransportlarni quvib o‘tish BHMning ikkidan bir qismi miqdorida jarimaga sabab bo‘ladi.
Yana bir qoidabuzarlik turi yo‘l harakati qoidalarida nazarda tutilgan hujjatlari bo‘lmagan shaxslarning avtotransportni boshqarishidir. Buning uchun haydovchiga nisbatan BHMning 1 baravari miqdorida jarima yoziladi.
Shuningdek, ishonchnomalarni, avtotransportni boshqa shaxsga o‘tkazish va ijaraga berish shartnomalarini ro‘yxatdan o‘tkazmasdan (hisobga qo‘ymasdan) boshqarish BHMning 1 baravari miqdorida, avtotransport egalarining fuqarolik javobgarligini majburiy sug‘urta qilish bo‘yicha sug‘urta polislarisiz boshqarish BHMning 2 baravari miqdorida jarimaga tortilishga sabab bo‘ladi.
Izoh (0)