Germaniyaning Saksoniya-Anhalt yeri Volmirshtedt shahridagi bo‘lajak stadion o‘rnida arxeologlar 332 ta inshootdan iborat bronza davriga oid shahar izlarini topdi. Qazishmalar natijasida bu yerda uch ming yildan ortiq vaqt oldin odamlar yashaganligi ma’lum bo‘ldi. Bu haqda La Brújula Verde (LBV) ilmiy-ommabop manba xabar bermoqda.
Arxeologik ishlar 2025-yil iyun oyidan beri Saksoniya-Anhalt yodgorliklarni muhofaza qilish va arxeologiya davlat boshqarmasi rahbarligida 21 ming kvadrat metr maydonni qamrab olgan. Hozirga qadar butun hududning beshdan bir qismi o‘rganilib, 322 ta arxeologik obyekt qayd etilgan va mingdan ortiq artefaktlar - sopol parchalari va bronza uzuklaridan tortib uy hayvonlari suyaklari va suyak bigizlarigacha topilgan.
Voqea joyida turar joy binolari, don omborlari va xo‘jalik inshootlari qoldiqlari aniqlangan. Yarim yerosti ustaxonalaridan birida arxeologlar vertikal to‘quv dastgohining toshlarini topgan. Bu esa mahalliy to‘qimachilik ishlab chiqarishi mavjud bo‘lganligini ko‘rsatadi. Shuningdek, olimlar uzunligi kamida olti metr va eni to‘rt metr bo‘lgan binoni qisman qayta tiklashga erishishgan.
“Eng g‘alati topilmalardan biri, ehtimol o‘choq vazifasini bajargan chuqurdagi Yevropa botqoq toshbaqasining kosasi bo‘ldi. Bu mintaqada ilk bor qayd etilayotgan toshbaqa go‘shtining iste’mol qilinganidan dalolat berishi mumkin”, deydi mutaxassislar.
Ta’kidlanishicha, ushbu hudud bronza davri Skandinaviya doirasi madaniyatlari va Lujitsa madaniyatining tutashgan joyi bo‘lgan. Bu topilmalarda ham o‘z aksini topgan: sopol buyumlar orasida davrning mahalliy etnomadaniy guruhlariga xos bo‘lgan ulkan saqlash idishlari, ovqat pishirish uchun ko‘zalar va bezatilgan kosalar mavjud.
Olimlarning eng katta e’tiborini g‘ayrioddiy dafn usuli tortgan. Sobiq axlat chuqurlaridan birida bo‘yi taxminan 170 sm bo‘lgan baquvvat erkakning skeleti topilgan.
“U boshini burib, bukchaygan holda yotardi. Dafn etishning bunday usuli o‘sha davr an’analariga - jasadni kuydirish va kulni manzilgohlardan tashqarida ko‘mish odatlariga zid”, deydi arxeologlar.
Tadqiqotchilarning taxminiga ko‘ra, bu alohida marosim, ikkilamchi dafn yoki ijtimoiy mavqe belgisi bo‘lishi mumkin.
Izoh (0)