AQSH Adliya vazirligi xodimlari moliyachi Jeffri Epshteyn ishi bo‘yicha hujjatlarni o‘rganib chiqib, ularda Donald Trampning nomi bir necha bor qayd etilganini aniqlagan. Bu haqda The Wall Street Journal gazetasi prezident ma’muriyatidagi yuqori lavozimli manbalarga tayanib xabar bermoqda.
Bu haqda Trampga may oyida bosh prokuror Pem Bondi va uning o‘rinbosari Oq uyda bo‘lib o‘tgan uchrashuvda ma’lumot bergan. WSJ suhbatdoshlarining aytishicha, uchrashuvda Trampga hujjatlarda Epshteyn bilan aloqada bo‘lgan ko‘plab shaxslar, jumladan, taniqli insonlar haqida “tekshirilmagan mish-mishlar” mavjudligi tushuntirilgan. Shu bilan birga, yig‘ilishda amaldorlar hujjatlarda ismning tilga olinishi o‘z-o‘zidan huquqbuzarlikni anglatmasligini ta’kidlashgan.
Bundan tashqari, manbalarga ko‘ra, Trampga Adliya vazirligi Epshteyn bo‘yicha qo‘shimcha tergov materiallarini e’lon qilish niyatida emasligi, chunki hujjatlarda bolalar pornografiyasi va jabrlanuvchilarning shaxsiy ma’lumotlari mavjudligi haqida xabar berilgan. Tramp vazirlik qaroriga ishonch bildirganini va materiallar e’lon qilinmasligiga e’tiroz bildirmasligini aytgan.
Nashrning AQSH prezidenti ma’muriyatiga yaqin suhbatdoshlariga ko‘ra, Federal qidiruv byurosi direktori Kesh Patel boshqa amaldorlarga Trampning ismi Epshteyn hujjatlarida ko‘rsatilganini maxfiy tarzda ma’lum qilgan. Patel WSJ savollariga javob berishdan bosh tortgan, biroq Adliya vazirligi saytidagi qo‘shimcha hujjatlar nima uchun e’lon qilinmasligini tushuntiruvchi memorandum “puxta tekshiruv natijalariga mos kelishini” ta’kidlagan.
15-iyul kuni ABC News jurnalisti Trampdan Pem Bondi unga Epshteyn fayllarida uning ismi borligini aytganmi, deb so‘ragan. Tramp “Yo‘q, yo‘q, u biz uchun juda qisqa ma’lumot bergan xolos”, deya javob bergan.
Oq uyning kommunikatsiyalar bo‘yicha direktori Stiven Chong esa “bu navbatdagi soxta xabar, xuddi The Wall Street Journal’da chop etilgan avvalgi hikoya singari” deb ta’kidlagan.
Izoh (0)