Eron tomonidan qo‘llab-quvvatlanadigan “Hizbulloh” harakati Livan parlamenti spikeri Nabih Berriga o‘z qurollarini topshirmasligini ma’lum qilgan. Bu haqda Al-Arabiya telekanali xabar berdi.
Telekanal manbalariga ko‘ra, guruh rahbariyati, hatto Isroil mamlakat janubidagi bahsli hududlardan chiqib ketgan taqdirda ham, o‘z qarorini o‘zgartirmaydi. Shu bilan birga, “Hizbulloh” hukumat bilan qarama-qarshilikka tayyor ekanini bildirgan.
Mazkur pozitsiya qurol-yarog‘larni faqat davlat nazoratida saqlashga harakat qilayotgan hukumat a’zolari tomonidan salbiy qarshi olindi. Ular “Hizbulloh” Isroil bilan urushda holdan toyganiga ishora qilib, bu “muammoni hal etish uchun boy berilgan imkoniyat” ekanini aytishgan.
Qo‘shma Shtatlar Livandagi yangi hokimiyatdan Hizbullohni qurolsizlantirish bo‘yicha chora ko‘rishni talab qilmoqda. AQSH maxsus vakili Tom Barrak shu hafta Livanga tashrif buyurib, harakatni qurolsizlantirishga qaratilgan yo‘l xaritasini muhokama qildi.
Livan prezidenti Jozef Aun esa maxsus vakilga “davlat nazoratini butun mamlakatga yoyish, qurolni faqat armiyada saqlash, urush yoki tinchlik bo‘yicha qarorlarni konstitutsion organlar qabul qilishini ta’minlash”ni nazarda tutuvchi memorandum loyihasini topshirdi.
“Hizbulloh” Isroil bilan urushda sezilarli darajada zaiflashdi. Kelishuvga ko‘ra, u Litani daryosining shimoliga chekinishi, janubda esa Livan armiyasi va BMT tinchlikparvar kuchlari qolishi kerak edi. Isroildan esa qo‘shinlarini to‘liq olib chiqish talab etilgan. Ammo yahudiy davlati vaqti-vaqti bilan Livanga zarba berib, harakat qo‘mondonlik zanjiridagi muhim shaxslarni nishonga olmoqda.
Izoh (0)