Royal Caribbean Navigator of the Seas elita kruiz laynerining 134 nafar yo‘lovchisi va 11 nafar ekipaj a’zosi AQSHdan Meksikaga va ortga sayohat paytida shubhali virusni yuqtirgan. Bu haqda Metro nashri xabar bermoqda.
Kema 4-iyul kuni Los-Anjeles portidan yo‘lga chiqib, 8-iyul kuni Meksikaning Puerto-Valyarta shahrida to‘xtagan va uch kundan so‘ng jo‘nash nuqtasiga qaytib kelgan. Layner bortida jami besh mingdan ortiq kishi bo‘lgan.
Kasallanganlarda bir xil alomatlar: qusish, ich ketishi va oshqozon spazmasi kuzatilgan. Kasallikka norovirus sabab bo‘lgani taxmin qilinmoqda. Kasallanishning aniq sababi hozircha noma’lum.
“Kemalarimiz bortida sog‘liqni saqlash va xavfsizlikni ta’minlashning eng yuqori darajasiga yordam beradigan muhitni saqlab qolish uchun biz qat’iy tozalash tartiblarini joriy etmoqdamiz. Bu tartiblarning ko‘pchiligi jamoat sog‘liqni saqlash idoralari tavsiyalaridan ancha yuqori”, dedi Royal Caribbean Group vakillari.
Kompaniya allaqachon kemada kuchaytirilgan tozalash choralarini ko‘rgan. Ma’lum qilinishicha, kasallangan yo‘lovchilar izolyatsiya qilingan.
Iyun oyida Xitoy va Osiyoning boshqa bir qator mamlakatlarida COVID-19 ning qayta avj olishiga yangi NB.1.8.1 varianti sabab bo‘lgani aniqlangani xabar qilingandi.
Izoh (0)