Musiqa sohasiga oid biografik filmlar tomoshabinlar orasida eng sevimli janrlardan biri hisoblanadi. Bu turdagi kartinalar orqali mashhur insonlarning sahna ortidagi hayotiga nazar tashlash, karyerasidagi baland-pastliklarni yoki ba’zan esa fojiali tarzda yakunlanuvchi hayotiy kechinmalarni ekranda guvohi bo‘lish mumkin.
Yaqin yillarda ekranlarda taniqli san’atkorlarning hayotiga bag‘ishlangan bir qator katta premyeralar taqdim etiladi. Quyida ulardan bir nechtasi haqida ma’lumot beramiz.
Bryus Springstin
Amerikalik rok afsonasi Bryus Springstin haqidagi “Deliver Me From Nowhere” filmi 2025-yil kuzida namoyish etilishi kutilmoqda. Rejissyor Skott Kuper suratga olayotgan ushbu kartina san’atkorning 1982-yilda yaratilgan “Nebraska” albomi qanday yozilgani haqida hikoya qiladi. Ushbu albom nafaqat Springstinning eng kuchli loyihasi, balki rok musiqasi tarixidagi eng yuksak asarlardan biri sifatida baholanadi.
Bryus Springstin hayoti davomida ikkita buyuk qo‘shiq yozgan. Birinchisi, “Born in the USA”, 1984-yilda Missisipi sharqini “portlatgan”. Ikkinchisi o‘n yildan keyin chiqqan.
“Bitlz” (The Beatles) guruhi
Taniqli rejissyor Sem Mendes “Bitlz” guruhining har bir a’zosi haqida alohida film suratga olishni rejalashtirmoqda. To‘rtta filmda mashhur “Ajoyib to‘rtlik” a’zolarining hayoti va ijodi yoritiladi. Agar hammasi reja bo‘yicha ketsa, bu biopiklar 2028-yilda taqdim etiladi.
Film tafsilotlari hali ko‘p emas, chunki loyiha ishlab chiqishning dastlabki bosqichida. Biroq Variety nashriga ko‘ra, asosiy rollarda quyidagi aktyorlar ishtirok etadi:
- Pol Makkartni — Pol Meskal
- Ringo Starr — Barri Keogan
- Jon Lennon — Xarris Dikinson
- Jorj Harrison — Jozef Kuinn
Maykl Jekson
Pop musiqaning qiroli Maykl Jekson haqida to‘liq metrajli biografik film — “Michael” filmi yaqin yillarda katta ekranlarda namoyish etiladi. Filmni taniqli rejissyor Antuan Fukua suratga olmoqda. Maykl obrazini esa uning jiyani — Jaafar Jekson gavdalantiradi.
Film aktyorning qaysi hayotiy bosqichlarni qamrab olishi hozircha noma’lum, ammo loyihaga bo‘lgan qiziqish allaqachon juda yuqori. Ayni paytda quyidagi aktyorlar ishtirok etishi ma’lum:
- Kolman Domingo va Nia Long — Mayklning ota-onasi Jo va Ketrin Jekson
- Mayles Teller — Jeksonning uzoq yillik menejeri Jon Branka
Dastlab premyera 2025-yil 3-oktyabrga rejalashtirilgan edi, biroq Deadline xabariga ko‘ra, filmni ikki qismga bo‘lib chiqarish ehtimoli ko‘rib chiqilmoqda.
Snoop Dogg
Mashhur reper Snoop Dogg haqida ham to‘liq biografik film suratga olinmoqda. Filmni Universal Pictures kino kompaniyasi hamda Snoop Dogg asos solgan Death Row Pictures prodyuserlik studiyasi birgalikda yaratadi.
Film Snoop Dogg’ning hip-hop san’atiga kirib kelishi, 1990-yillarda ommaga tanilishi, musiqiy va kinematografik faoliyatidagi muhim bosqichlar, shuningdek, uning biznes olamidagi muvaffaqiyatlarini yoritib beradi.
Rejissyorlikni taniqli kinoijodkor Kreyg Bryuer o‘z zimmasiga oldi. U avvalroq 2005-yilda suratga olingan “Shovqin va oqim” (Hustle and Flow) nomli film orqali tanilgan. Ushbu drama DJ ismli reperning mashhurlikka erishish yo‘lini hikoya qiladi. Film “Oskar”ning “Eng yaxshi original qo‘shiq” (It’s Hard Out Here for a Pimp) nominatsiyasida g‘olib bo‘lgan.
Madonna
Pop musiqaning eng mashhur san’atkorlaridan biri Madonna haqidagi serial ustida bir necha yildan beri ish olib borilmoqda. loyiha hozirda dastlabki ishlab chiqish bosqichida. Serial prodyuseri sifatida “Ideal juftlik”, “Ko‘rinmas nur” seriallari hamda “Asosiy qahramon” va “Dedpul va Rosomaxa” filmlari rejissyori Shon Levi ishlamoqda.
Ta’kidlanishicha, miniserial ilgari Universal studiyasi tomonidan suratga olinishi rejalashtirilgan to‘liq metrajli biografik filmga aloqador emas. O‘sha vaqtda filmda pop musiqaning qirolichasi rolini uch karra “Emmi” mukofoti sohibasi Julia Garner ijro etishi ko‘zda tutilgan edi.
Hozircha Madonna karyerasining aynan qaysi davri serialda yoritilishi noma’lum. Shunga qaramay, ko‘pchilik “Ozark” seriali yulduzi Julia Garner ushbu serialda ham Madonnaning obrazini gavdalantirishiga ishonmoqda. Sababi, 2023-yilda Garner xonandaning Celebration Tour gastrol konserti doirasida sahnada u bilan birga ko‘rinish bergan edi. Bu esa aktrisaning yosh Madonna roliga tanlanishini qo‘llab-quvvatlaganini ko‘rsatadi.
Net King Koul
Aktyor va rejissyor Kolman Domingo mashhur afroamerikalik xonanda Net King Koul haqidagi film ustida ishlamoqda. Domingo filmda bosh rolni o‘ynabgina qolmay, uni o‘zi suratga oladi. U 2024-yil yanvarida Variety’ning podkastida loyiha haqida ilk bor ochiq gapirgan edi.
Bundan avval Domingo xonandaning 1957-yildagi Rojdestvo teletomoshasiga bag‘ishlangan Lights Out: Nat King Cole spektaklini sahnalashtirgan edi.
Frenk Sinatra
Rejissyor Martin Skorseze tomonidan suratga olinadigan Frank Sinatra haqidagi film ham eng kutilayotgan filmlardan biridir. Sinatra XX asr Amerika musiqasi va pop madaniyatining afsonasi bo‘lgan. Variety’ning 2024-yilgi xabariga ko‘ra, bosh rolda Leonardo Di Kaprio, Sinatra rafiqasi rolida esa Jennifer Lourens suratga tushadi. Loyiha ustida ish boshlash dastlab 2024-yilga mo‘ljallangan edi, biroq Skorsezening boshqa loyihalari bilan birgalikda bu film ham vaqtincha ortga surilgan.
Izoh (0)