Rossiyalik muxolifatchi Navalniyning zaharlanishi haqidagi surishtiruv Amerikaning “Emmi” mukofotiga sazovor bo‘ldi

Rossiyalik muxolifatchi Aleksey Navalniyga qilingan suiqasd yuzasidan bir qancha ommaviy axborot vositalari jurnalistlarining birgalikda olib borgan surishtiruvi “Yangiliklar dasturidagi surishtiruv-reportaj” nominatsiyasi bo‘yicha Amerika televideniyesining “Emmi” mukofotiga sazovor bo‘ldi. Bu haqda Meduza xabar berdi.

Mukofot CNN telekanalida 2020-yilning dekabr oyida namoyish etilgan surishtiruv natijalari to‘g‘risidagi hisobotga berildi. CNN bilan birga surishtiruvni Insider, Bellingcat va Der Spiegel agentliklari olib borgan.

Surishtiruv ishtirokchilarining yakuniy xulosasiga ko‘ra, 2020-yilning avgust oyida Navalniy “Novichok” guruhiga kiruvchi modda bilan Federal xavfsizlik xizmati (FXX) maxsus guruhi xodimlari tomonidan zaharlangan, ularning ortida esa FXX sud ekspertizasi instituti turgan. Zaharlashda ishtirok etgan kishilarning shaxsi mobil telefonlarning hisob ma’lumotlarini oflayn ma’lumotlar bazasi bilan solishtirish natijasida aniqlandi.

CNN ma’lumotlariga ko‘ra, suiqasdni amalga oshirishga 8 kishi aloqador. Bu odamlar odatda haqiqiy ismi va laqablarini o‘zgartirgan holda ikki yoki uch kishidan iborat guruhlarga bo‘linib harakatlangan. Ular har safar Navalniy borgan shaharga borgan, deb yozadi gazeta.

FXX Navalniyning zaharlanishiga aloqadorligini rad etgan va bunday ayblovlarni “FXX va uning xodimlarini obro‘sizlantirish maqsadida oldindan rejalashtirilgan provokatsiya” deb atagan.

Rossiya prezidenti Vladimir Putin surishtiruvni “Amerika maxsus xizmatlarining materiallarini qonuniylashtirish” deb baholadi. Uning so‘zlariga ko‘ra, bu Rossiyaning yuqori martabali amaldorlariga hujum qilishga urinish va “siyosiy urush hiylasi”.

2020-yil 20-avgust kuni Moskvaga uchayotgan yo‘lovchi samolyotida Navalniyning sog‘lig‘i yomonlashgan. Layner zudlik bilan Omskka qo‘ndirilib, muxolifatchi kasalxonaga yotqizildi. Ikki kundan keyin uni Germaniyaning “Sharite” kasalxonasiga olib ketishdi. Muxolifatchining sheriklari uni zaharlashganini da’vo qildi.

Oktabr oyi boshida Germaniya hukumati Navalniyning organizmidan “Novichok” guruhiga kiruvchi jangovar zahar izlari topilgani haqida xabar berdi. Keyinchalik buni Fransiya va Shvetsiya laboratoriyalari tasdiqladi. Omsk shifokorlari zaharlanish izlarini topmadi.

Rossiya hukumati Navalniyning zaharlanishiga aloqadorligi bo‘yicha ayblovni bir necha bor rad etgan. 2020-yil noyabr oyida Rossiya Tashqi ishlar vaziri Sergey Lavrov muxolifatchi Germaniyada yoki Rossiyadan u yerga ketayotgan samolyotda jangovar zaharlovchi modda kimyoviy dozasini olgan bo‘lishi mumkinligini aytdi. Rossiyaning yuqori rahbariyati, shu jumladan shaxsan Putin, Germaniya hukumatini Rossiyaning talabiga binoan Navalniyning tahlillari natijalari va uning zaharlanish sabablari haqidagi ekspert xulosalarini bermagani uchun bir necha bor tanbeh berdi.