Jeyms Kemeronning “Titanik” filmi kassa rekordini o‘rnatib, 1998-yilda “Oskar”ning ko‘plab statuetkalarini qo‘lga kiritdi va pop madaniyatining asosiy qismiga aylandi.
Bugun Amerika Qo‘shma Shtatlarida keng ko‘lamli kartina premyerasi boshlanganiga roppa-rosa 25 yil bo‘ldi. Yillar o‘tadi, ammo “Titanik” filmi Titanik kemasidan farqli ravishda “cho‘kmas” bo‘lib chiqdi. Muhim sana sharafiga film haqidagi eng qiziqarli faktlar sizni olamshumul voqeaga yangicha qarashga majbur qiladi.
Titanikda haqiqatan ham Douson familiyali odam bo‘lgan
Jek Douson — butunlay to‘qima qahramon, biroq haqiqiy kema bortida xuddi shunday familiyali shaxs bo‘lgan (yo‘lovchining ismi Jozef edi). Yigit 23 yoshda bo‘lgan, film premyerasidan so‘ng uning qabri ziyorat qilinadigan mashhur joyga aylandi. Jeyms Kemeronning o‘zi haqiqiy Douson haqida film suratga olingandan keyin bilganini va qahramon nomini Di Kaprio o‘ylab topganini ta’kidlaydi.
Lindsi Lohan filmda rol o‘ynashi mumkin edi
Film chiqqanida 8 yoshda bo‘lgan 2000-yillarning yulduzi Lindsi Lohan “Titanik” filmida epizodik rolda chiqishi mumkin edi. Jek Douson yo‘lovchi qizaloq bilan raqsga tushgan paytni eslang. Ma’lum bo‘lishicha, Kemeron Lindsi Loxanga bu rolni berish fikridan qaytgan, chunki uning malla sochlari Rouz va uning onasi Rutni eslatardi. Tomoshabinlar qizaloqni Rouzning qarindoshi deb o‘ylamasliklari uchun qahramonni Aleksandra Ouens-Sarno o‘ynaydi.
Kayutada qolgan keksa turmush o‘rtoqlar haqiqiy prototiplarga ega edi
Yurakni ezuvchi bu lahzani eslasangiz kerak: keksa er-xotin cho‘kayotgan kemadan ketishni o‘ylamay, kayutadagi karavotda birgalikda halok bo‘ladi. Qahramonlarga asos bo‘lgan odamlar Isidor va Ida Shtrauss bo‘lgan. Er-xotin 40 yil turmush qurgan va guvohlar aytganidek, ular doimo birga bo‘lishga harakat qilgan. Shuningdek, Isidorga qutqaruv qayig‘iga chiqish taklif qilingani, biroq u bortda ayollar va bolalar bo‘lgan paytda bundan bosh tortgani ma’lum. Ida ham kemani erisiz tark etishni xohlamaydi. Sevishganlarni oxirgi marta kemada ko‘rishgan: ular kreslolarida o‘tirgan holda bir-birlarining qo‘llarini ushlab olishgan. Shtrauslar Macy’s do‘konlariga egalik qilgan. Hozirda ham univermagning birinchi qavatida ularga bag‘ishlangan yodgorlik lavhasini ko‘rish mumkin.
Kema 02:20 da cho‘kadi, filmda esa soat 02:15 ni ko‘rsatmoqda
Kemeronning filmi uch soatdan ortiq davom etadi. Qizig‘i shundaki, kema halokat sodir bo‘lgan paytdan boshlab okeanga cho‘kishi uchun 2 soat 40 daqiqa vaqt o‘tadi. Boshqacha qilib aytganda, Titanik filmda tasvirlangandek tez cho‘kmagan. Layner soat 23:40 da aysberg bilan to‘qnashgan va 02:20 da batamom suv ostida qolgan. Rejissor tomoshabinlar e’tiborini soatga qaratadi – millar 02:15 ni ko‘rsatadi, ya’ni ulkan kemaning suv ostiga g‘oyib bo‘lishiga atigi besh daqiqa qoldi. Finalda Rouz va Jek kemada uchrashganda soat hali ham 02:20 ni ko‘rsatadi — laynerdagi vaqt abadiy to‘xtaydi.
Film oxiridagi Fabritsioning pichog‘i u Jek bilan kartada yutib olgan pichoq edi
Ma’lumki, film boshida Jek va uning do‘sti Fabritsio karta o‘ynashadi. Omad ularga kulib boqadi: bir necha daqiqadan so‘ng yigitlarning cho‘ntagida Titanikka chiqish chiptalari, naqd pul, soat va pichoq bor edi. Film oxirida Fabritsio xuddi shu pichoq bilan qutqaruv qayig‘ining arqonlarini kesib tashlaydi. Bundan tashqari, stoldagi soat 11:53 ni ko‘rsatib turibdi: do‘stlar kemaga chiqib olishi uchun roppa-rosa 7 daqiqa vaqtlari bor, kema esa soat 12:00 da jo‘nab ketishi kerak.
Pirilldoq o‘ynayotgan bola sahnasi haqiqiy suratdan olingan
Filmda e’tibordan chetda qoladigan kichik, ammo muhim tafsilotlarning butun palitrasi mavjud. Ulardan biri — Jek birinchi sinf palubasiga yo‘l olayotganida, pirilldoq o‘ynayotgan bolaning e’tiborga arzimaydigan sahnasi. Suratga olish jarayonida rejissor 1912-yil 11-aprelda irlandiyalik iezuit ruhoniysi va fotograf Frensis Braun tomonidan olingan suratdan foydalangan. Suratda 6 yoshli Robertning o‘sha paytdagi an’anaviy o‘yinchoqni o‘ynab zavqlangani tasvirlangan. Braun halokatning guvohi bo‘lmagan, chunki erkak kema yurmasidan avval undan tushib qolgan. Bolakay otasi bilan birga tirik qolganlar orasida bo‘lgan, ammo halokatdan ko‘p o‘tmay, Robert baxtsiz hodisa tufayli vafot etadi.
Filmdagi spirtli ichimlik tufayli omon qolgan oshpaz haqiqiy odam hikoyasiga asoslangan
Haqiqiy yo‘lovchi hayotiga asoslangan yana bir kichik qahramon — bu kema halokati paytida flyagadan ichadigan oshpaz. Kemeron ikki soat sovuq suvda qolib, tirik qolgan oshpaz Charlz Jon Jovinning hikoyasidan ilhomlangan. Bu odam kemani tark etganlarning so‘nggi omon qolgani edi. Charlzning o‘zi avvalroq ichgan spirtli ichimlik tufayli muzli okeandan aziyat chekmaganiga ishonadi.
Kemeron filmga qo‘shiq kiritishni rejalashtirmagan, biroq Selin Dionning ovozi uning fikrini o‘zgartirgan
Musiqa bo‘yicha yordam so‘rab Kemeron bastakor Jeyms Xornerga murojaat qiladi. Rejissor filmning vokalsiz ohanglarga ega bo‘lishini xohlayotgani ma’lum edi. Biroq Xorner Selin Dion bilan My Heart Will Go On qo‘shig‘ini yozadi. Kemeron bastakorning taklifiga rozi bo‘ladi, 25 yildan keyin bu uning eng to‘g‘ri tanlovi bo‘lib chiqadi. Qo‘shiq film bilan chambarchas bog‘liq bo‘lib, “Titanik”ni kanadalik ijrochining taniqli ovozisiz tasavvur qilib bo‘lmaydi.
Original filmda tungi osmon noto‘g‘ri tasvirlangan va 2012-yilda o‘zgartirilgan
Ko‘plab ishonchli detallarga qaramay, film xatolardan xoli emasdi. Misol uchun, Rouz eshik parchasida yotib, yulduzlarga qaragan paytni eslang. Eng ziyrak tomoshabinlar qahramon 1912-yildagi osmonni ko‘rmaganligini payqashdi. Amerikalik astrofizik Nil deGrasse Tayson rejissorni tegishli tuzatishlar kiritishga ko‘ndiradi. Oxir-oqibat Kemeron olimdan yulduzlarning aniq joylashuvini yuborishni so‘raydi. 2012-yilda, falokatning 100 yilligi munosabati bilan “Titanik”ning qayta ekranlarga chiqarilishida tungi osmon zamon haqiqatiga moslanadi.
Keksa Rouzning iti kema halokatidan omon qolgan pomeran kuchuklariga hurmat yuzasidan ko‘rsatiladi
Keksa Rouzning qo‘llarida oq shpits ko‘rsatilgan. Aslida mazkur zotni tanlash tasodifiy emas. Halokatdan omon qolgan uchta itdan ikkitasi pomeran kuchuklari edi. Layner cho‘kayotganda yo‘lovchi itlarni uychalaridan chiqarib yuboradi. Lekin afsuski, bu sahna filmning yakuniy qismiga kiritilmagan.
Ssenariyda haqiqiy omon qolganlarning iqtiboslari mavjud
Jeyms Kemeron ssenariyga kema halokatidan omon qolgan haqiqiy odamlarning iboralarini kiritadi. Jek Rouzni dengizga sakrashidan to‘xtatmoqchi bo‘lgan ajoyib manzarani eslang. Qahramon qizga bir paytlar muzdek suvga tushib ketganini aytadi va bu dardni butun vujudini teshgan mingta pichoq bilan solishtiradi. Mazkur iqtibos kema kapitanining ikkinchi yordamchisi Charlz Gerber Laytollerdan olingan bo‘lib, u kema halokati paytida o‘z tajribasini xuddi shunday tasvirlab bergan.
Jeyms Kemeron kema qoldiqlarini ko‘rish uchun o‘zi suvga sho‘ng‘iydi
Falokat haqida film suratga olish g‘oyasi rejissorga mashhur kema qoldiqlarini topgan guruhni boshqargan amerikalik tadqiqotchi Robert Ballard bilan uchrashgandan so‘ng kelgan. Kemeron suvga bir yoki ikki emas, balki 12 marta sho‘ng‘iydi. Rejissor laynerni ko‘zdan kechiradi, suratga oladi va fojiali voqeaga tobora singib ketadi. Filmda rejissor suratga olgan kadrlar namoyish etiladi, bu esa “Titanik”ni yanada real qilib ko‘rsatadi.
Rouzning portreti va Jekning papkasidagi boshqa rasmlarni Jeyms Kemeronning o‘zi chizgan
Qizig‘i shundaki, eskizlarni yaratuvchi qo‘l umuman Di Kaprioga emas, balki Kemeronning o‘ziga tegishli. Rejissor nafaqat Rouzning portretini, balki Jekning barcha eskizlarini ham o‘zi chizgan. Bundan tashqari, Di Kaprio o‘naqay, Kemeron esa chapaqay. Ekranda real ko‘rinishi uchun rejissor tasvirlarning aksini ko‘rsatadi.
Mavzuga doir:
Izoh (0)