Bahrayn AQSH iqtisodiyotiga, taxminan, 17 milliard dollar miqdorida sarmoya kiritishni rejalashtirmoqda. Bu haqda prezident Donald Tramp bilan uchrashuvda Bahrayn Qirolligi bosh vaziri va valiahd shahzodasi Salmon bin Hamad bin Iso Al Xalifa ma’lum qildi.
Biz AQSHga yo‘naltiriladigan 17 milliard dollarlik bitimlar haqida e’lon qilishdan mamnunmiz. Bu haqiqat. Bu soxta kelishuvlar emas, balki real mablag‘lardir, dedi u.
Ammo bosh vazir aniq qaysi loyihalar haqida so‘z borayotganini ochiqlamadi. Bahrayn valiahd shahzodasi Tramp bilan muzokaralarda “xavfsizlik, savdo va investitsiyalarga oid masalalarni” muhokama qilishni rejalashtirayotganini aytgan.
Bahraynning Gulf Air milliy aviakompaniyasi Boeing va General Electric kompaniyalari bilan 7 milliard dollarlik shartnoma imzolashi kutilmoqda. Bitim 40 ta aviatsiya dvigateli, 12 ta samolyot, shuningdek, yana 6 ta laynerni xarid qilish imkoniyatini o‘z ichiga oladi.
Bahrayn axborot agentligiga ko‘ra, valiahd shahzodaning AQSHga tashrifi doirasida ikki davlat kompaniyalari allaqachon 17 milliard dollarlik kelishuvlarga erishgan. Xususan, Cisco Systems kompaniyasi Bahrayn hukumatining axborot va telekommunikatsiya infratuzilmasini modernizatsiya qilish uchun raqamli yechimlarni taqdim etadi. Bundan tashqari, Bahrayn moliya muassasalari hamda xususiy kompaniyalari Amerika iqtisodiyotiga 10,7 milliard dollar sarmoya kiritish niyatida.
Ma’lumot o‘rnida, bu Xalifaning Oq uyga uchinchi bor tashrif buyurishidir. Mazkur tashrif Trampning may oyida Saudiya Arabistoni, Qatar va BAAga qilgan Yaqin Sharqqa safari ortidan amalga oshdi.
Safar davomida bir qator yirik kelishuvlar e’lon qilingan edi. Jumladan, Qatar AQSH bilan 1,2 trillion dollarlik, Saudiya Arabistoni esa 600 million dollarlik iqtisodiy hamkorlik majburiyatini olgan. Shuningdek, AQSH Saudiya Arabistoniga 142 milliard dollarlik qurol-yarog‘ sotish bo‘yicha ham bitim tuzgan.
Izoh (0)