Aktrisa Gavhar Zokirovaning eslashicha, bo‘lajak turmush o‘rtog‘ining akasi, O‘zbekiston xalq artisti Botir Zokirov uyiga sovchi bo‘lib kelganida otasi hayajondan to‘yga rozilik berib yuborgan. U bu haqda “Qurultoy” podkastiga bergan intervyusida ma’lum qildi.
Biz Jamshid Zokirov bilan birga o‘qirdik. Akasi Botir Zokirov uyimizga sovchi bo‘lib kelishini ota-onam bilmagan. Er-xotin qotib qolishgan. U kishining indamasdan xonadonimizga kirib kelishi dahshat voqea bo‘lgan. Botir Zokirov “Ukam sizning qizingizni olmoqchi”, degan. Dadam “A?! Mening qizimni oladimi? Sizning ukangizmi? Omin, Allohu akbar, olib ketaveringlar!”, deb javob bergandi, deydi Gavhar Zokirova.
Aktrisaning aytishicha, qaynotasi Karim Zokirov o‘g‘lining to‘yi uchun uchun qarz olgan.
U vaqtlarda yordam kassasi bo‘lardi. O‘sha yerdan qaynotam Karim Zokirov o‘g‘lini uylantirish uchun katta qarz olgan. To‘yimiz 1971-yilda bo‘lgan, qaynotam 1977-yilda vafot etdilar. Qarzlarni to‘lab bo‘lgandan keyin olamdan o‘tdilar. Jamshid akam bilan o‘sha hujjatni ko‘rganmiz. Lekin biron marotaba “Men sizlarning to‘yingiz uchun qarz olganman” deb aytmagan. Shunaqa oliyjanob oila edi, deydi aktrisa.
Gavhar Zokirovaning turmush o‘rtog‘i — O‘zbekistonda xizmat ko‘rsatgan artist, kino va teatr aktori Jamshid Zokirov uzoq davom etgan saraton kasallik oqibatida 2012-yilda vafot etgan. Qaynotasi O‘zSSR xalq artisti Karim Zokirov 1912—1977-yillarda yashab, ijod qilgan. Qaynakasi Botir Zokirov xonanda (lirik-dramatik tenor), aktyor, rassom. O‘zbek zamonaviy professional estrada qo‘shiqchi (ijrochi)ligining asoschisi, O‘zbekiston xalq artisti, “Buyuk xizmatlari uchun” ordeni sohibi.
Ma’lumot uchun, “Yuksalish” harakati o‘tkazgan so‘rovnoma natijasiga ko‘ra O‘zbekistonliklarning chorak qismi to‘y qilish uchun qarz oladi.
Izoh (0)