O‘zbek milliy akademik drama teatri aktrisasi Mahfuza Bobotillayeva “Omon-omon” ko‘rsatuviga bergan intervyusida og‘ir jarrohlik amaliyotini boshdan kechirgani haqida so‘zlab berdi.
“Operatsiyaga kirishdan avval yig‘lamadim. Demak, shunday bo‘lishi kerak ekan, taqdirda bor ekan deb o‘yladim. Lekin bu osonlikcha bo‘lgani yo‘q. Operatsiyaga bir oy tayyorlashdi. Jarrohlik amaliyoti tugaganidan so‘ng shifokorlar o‘z qo‘llari bilan reanimatsiyadan ko‘tarib olib chiqishdi. Ko‘zimni ochsam, hamma menga qarab turibdi. “Mahfuza opa, nima xohlaysiz?”, deb so‘rashdi.
Ular shu orqali miyam qay darajada ishlayotganini bilishmoqchi bo‘lishdi. Men ham tarvuz xohlashimni aytdim. Tezgina tarvuz olib kelib berishdi. Tarvuzni shunday shimibmanki, hayotni shimayotgandek. Shu damda hayot naqadar totli, naqadar go‘zal ekanligini his etdim.
Hech narsa muhim emas. Muhimi siz tiriksiz va sog‘siz”,— deydi aktrisa.
Aktrisa suhbat davomida og‘ir kunida uni yolg‘iz qoldirmay, yo‘qlab turgan hamkasblariga ham minnatdorchilik bildirdi.
“Kasalxonada yotganimda hamkasblarim tinmay yo‘qlab turishdi. Shifokorlarning mumkinmas, deyishga qaramay, Gavhar Zokirova, Sayyora Yunusova, Saida Umarova, Zilola G‘ulomovalar kechasi syomkadan keyin qandaydir qilib palatamga kirishadi.
Aktyorlarimiz operatsiya kuni, operatsiyadan keyin mashinasi bilan kasalxona darvozasi oldida turishibdi. Birdaniga nimadir kerak bo‘lib qolsa, olib kelib beraylik deb. Sog‘ayib teatrga ishga chiqqanimdan so‘ng ularning barchasiga o‘z minnatdorchiligimni bildirdim”, — deydi Mahfuza Bobotillayeva.
Izoh (0)