Sharof Rashidov tumani hokimi Mahmud Xolbo‘tayev 10 ming dollar pora olayotganda DXX xodimlari tomonidan ushlandi. Bu haqda Davlat xavfsizlik xizmati xabar berdi.
Maʼlum qilinishicha, Jizzax viloyati Sharof Rashidov tumani hokimligi bosh mutaxassisi o‘rtada “dallol” vazifasini bajargan. U maktab qurishga ajratilgan 1,7 gektar yerni tadbirkorga ko‘p qavatli uylar qurilishi uchun ajratishga ruxsat olib berishini aytgan. Evaziga 30 ming dollar talab qilgan.
Joriy yil 5-iyul kuni bosh mutaxassis so‘ralgan pul mablag‘idan 10 ming dollarini olib, tuman hokimiga yetkazgan. 8-iyul kuni esa tadbirkordan qolgan 20 ming dollarni ham undirgan. Keyin unga ko‘p qavatli uy qurish uchun hokim tomonidan ruxsat berilgan hujjatlarni taqdim etgan.
Bosh mutaxassis hokimiyat binosi oldida tuman rahbari Mahmud Xolbo‘tayev bilan uchrashib, hokimga 10 ming dollar bergan vaqtida DXX xodimlari tomonidan qo‘lga olingan.
“Hozirda Sharof Rashidov tumani hokimi deputatlik daxlsizlik huquqidan mahrum qilinib, unga nisbatan Jinoyat kodeksining 210-moddasi bilan, bosh mutaxassisga esa Jinoyat kodeksining 168 va 211-moddalari bilan jinoyat ishi qo‘zg‘atildi”, deya xabar bergan DXX.
Shu bilan birga, Sirdaryo viloyatida kuzatilgan boshqa bir korrupsion harakat fosh bo‘lgani xabar qilingan. Guliston shahar prokurori o‘rinbosari o‘z xizmat mavqeidan foydalanib, tadbirkordan pora talab qiladi. Voqea Boyovut tumanida qishloq xo‘jaligi sohasida faoliyat yurituvchi MCHJ rahbari bilan yuz beradi. Prokuror Boyovut tumani IIB Tergov guruhi ish yurituvidagi Jinoyat kodeksining 168 va 167-moddalari bilan qo‘zg‘atilgan jinoyat ishi doirasida “qamoq” ehtiyot chorasi qo‘llamaslik hamda keyinchalik ishni gumonlanuvchi foydasiga hal qilib berish evaziga 10 ming dollar pora so‘raydi.
DXX xodimlari tomonidan o‘tkazilgan tezkor tadbirda qonun himoyachisi talab qilingan pulni o‘z xizmat xonasida olgan vaqtida ashyoviy dalillar bilan ushlangan.
Prokuror o‘rinbosariga nisbatan Jinoyat kodeksining 168 va 28,211-moddasi bilan jinoyat ishi qo‘zg‘atilgan.
Xabarga ko‘ra, yuqoridagi har ikki holat yuzasidan mansabdor shaxslarga nisbatan “qamoq” ehtiyot chorasi qo‘llanilib, tergov harakatlari olib borilmoqda.
Izoh (0)