Telegram messenjeridagi kanallarda Farg‘ona viloyatining Furqat tumanida hokimlik yig‘ilishida bo‘lgan mahalla raisining tobi qochib, hokimlik binosida jon bergani xabar berildi. “Daryo”ga voqea tafsilotlarini gapirib bergan marhumning qizi 61 yoshli otasining jasadi hokimiyat binosidan chiqqanini tasdiqladi.
Hokim soliq yig‘imiga bag‘ishlangan tanqidiy yig‘ilish o‘tkazgan
Marhumning qizi Muxlisa Aʼzamovaga ko‘ra, marhum Shaʼrifjon Abdullayev hokim tomonidan majburiyat sifatida belgilangan 5 million so‘mlik kunlik soliq yig‘imi rejasini bajara olmagan.
O‘sha kuni dadam odamlarning uyiga kirib-chiqib jami 3 million 527 ming so‘m soliq yig‘imini to‘plagan ekan. Qolgan 1,5 million so‘mini ertangi rejaga qo‘shib bajaraman desa, hokim “otning kallasidek oylik olyapsan, qolgan summani yoningdan qo‘shib bo‘lsa-da, to‘laysan”, degan. Dadam bundan ortig‘ini qilolmayman, sog‘lig‘im ko‘tarmaydi desa, “unda arizangni yoz”, degan hokim. O‘g‘lidan ham kichik insonning bu muomalasi dadamga og‘ir botgan. Xo‘p deb, oldi qatorga o‘tgan va bo‘shash haqida ariza yozgan. Ariza yozish vaqtida ham qo‘llari qaltirab, zo‘rg‘a yozgan, deydi marhumning qizi.
Hokim mahalla raislarini qamatib yuborish bilan qo‘rqitgan
Muxlisa Aʼzamovaning aytishicha, yig‘ilishda hokim mahalla raislariga qarata “Men katta joylarda ishlab kelganman. ‘Revizor’ bo‘lganman. Sizlarni jinoiy javobgarlikka tortib yuborish qo‘limdan keladi”, degan.
O‘sha kuni hokimning gapi dadamga og‘ir botgan. Chunki dadam ikkinchi marta qayta saylovda ham 98 foiz ovoz bilan xalq tomonidan saylangan-da. O‘zi aslida ishlamoqchi emas edi. Mayli xalq sayladi, elga xizmat qilay, xalqqa foydam tegsin deb ishlayotgandi, deydi marhumning qizi.
Murojaatchilar o‘sha kuni hokim yig‘ilishi ishdan tashqari vaqtda, kechki 20:00 da boshlanganini va kech 22:00 ga qadar davom etganini, buni o‘sha kungi kamera yozuvlari ham tasdiqlab turganini aytmoqda.
Dadam arizasini yozib, tashqariga chiqib xayol bilan “O‘zimning mashinamga keldim”, deb avtoturargohga ham borib qaytgan. Videoda ko‘rinishicha, avtoturargohdan qaytgach, hokimiyat binosidagi zinaga o‘tirgan. O‘sha yerdan qorovul va qo‘riqlash xizmatidagilar bilan ozgina gaplashgan. Shundan keyin shu zinada yiqilib, o‘sha yerda jon beribdi. Tez yordam chaqirishgan, tez yordam kelavermagach, o‘sha yerdagilardan birining Nexia mashinasiga ortib, shifoxonaga olib ketayotganda tez yordam oldidan chiqishgan. Ammo u vaqtga qadar dadamning joni uzilib bo‘lgan, deydi u.
“Mayitni 14 soat ushlab turishdi”
Marhumning qizi Shaʼrifjon Abdullayev vafot etgach, Qo‘qon shahar morkiga olib ketilganini, mayit morkda 14 soat ushlab turilganini qo‘shimcha qilmoqda.
Ertasi kuni ertalab soat 8:30 da mayitni oldik, — deydi u.
Marhumning qizi otasi bundan avval ham hokimiyatning soliq yig‘ish majburiyatidan noliganini eslamoqda.
Dadam bu holatdan har doim nolib kelgan. Ishdan tashqari paytdagi majlislar har bir insonni toliqtiradi. O‘sha kuni ham “Borgim kelmayapti, oyog‘im tortmayapti”, deganlarida, ayam “Endi hokim majlis qilibdi, behurmatlik bo‘lmasin, borib keling, dadasi”, deb jo‘natib yuborgan bo‘lgan. Har doim hokimning gapini ikki qilmasdan, majlisga o‘z vaqtida yetib borgan, har doim qatnashgan. Majlisdan kelib, “Hokim yomon gapirdi, haqorat qildi”, degan. Hokim bu voqeadan so‘ng, birinchi navbatda uzr so‘rashi kerak edi. Besh minut vaqt ajratib bo‘lsa ham ta’ziyaga kelishi kerak edi. Lekin biz hokimni kechgacha kutdik, kelmadi, — deydi marhumning qizi.
Hokimlik nima deydi?
Furqat tumani hokimligi mazkur holat bo‘yicha munosabat bildirar ekan, marhumning yaqinlariga taʼziya izhor qilib, mahalla raisi hokim tomonidan haqoratlanganini inkor qildi.
“Kaldushon” mahallasi raisi Sha’rifjon Abdullayevning oila aʼzolari va yaqinlariga chuqur hamdardlik izhor etamiz. Joriy yil 18-iyun kuni tuman hokimligida o‘tkazilgan yig‘ilishda mahalla fuqarolar yig‘inlari raislari ishtirok etgan bo‘lib, unda ularga zimmasiga yuklatilgan vazifalar ijrosi yuzasidan topshiriqlar berilgan. Yig‘ilish tanqidiy ruhda o‘tgan, lekin tuman hokimi tomonidan shaxsga nisbatan haqoratli so‘z ishlatilmagan. “Kaldushon” mahallasi raisi Sha’rifjon Abdullayev yig‘ilish paytida sog‘ligi bilan bog‘liq muammolar sababli faoliyatini to‘xtatmoqchiligi aytib, yig‘ilishni tark etgan. Hokimlik tashqi hovlisida sog‘lig‘i yomonlashgani sababli tez yordam chaqirilgan, tuman tibbiyot birlashmasiga olib borilgan. Afsuski, shifokorlarning saʼy-harakatlariga qaramasdan, vafot etgan, deyiladi hokimlik munosabatida.
“Mahalla raislari soliq yig‘imiga majburlanishi bor gap”
“Daryo” jurnalisti bilan suhbatda bo‘lgan, ammo shaxsi sir qolishini so‘ragan mahalla raisining aytishicha, hududlarda mahalla raislariga soliq yig‘imi bo‘yicha majburiyat yuklanishi bor gap.
Eng kamida 5 million, agar soliq qarzdorligi yuqori mahalla bo‘lsa raisga 10 million so‘mgacha “plan” qo‘yiladi. Eng yomoni shuncha yig‘ilgan pul rais yig‘di emas, soliqchi yig‘di degan hisobot bilan, mukofoti ham soliq xodimiga beriladi. Biroq mahallalarga biriktirilgan soliqchilar kam sonli bo‘lgani uchun mahallada soliq yig‘ish ishlarida deyarli ko‘rinish berishmaydi. Shunday paytda odamlar raisga siz soliqchi emas-ku, nega sizga pul to‘lashimiz kerak, pul to‘langani haqidagi kvitansiyani kim beradi degan savollarni beradi, deydi suhbatdosh rais.
Izoh (0)